Skip to main content

Air Greenlandimi saqisut ulloq 2. december suliumajunnaarnissartik nalunaarutigisimavaat

Saqisut kattuffiannit suliumajunnaartoqarnissaa Air Greenlandimut nalunaarutigineqarsimavoq, illuatungeriillu nutaamik isumaqatigiissuteqarnissaat anguniarlugu decembarillu aappaani suliumajunnaartoqarsinnaanera pinngitsoortinniarlugu marlunngorpat isumaqatigiissitsiniartarfimmut qaaqquneqarsimapput.

FPU suliumajunnaartoqarnissaanik nalunaaruteqarmat, Isumaqatigiissitsiniartarfimmit Air Greenlandi aamma Flyvebranchens Personale Unioni (FPU) saqisut nutaamik isumaqatigiissusiornissaat pillugu marlunngorpat isumaqatiginninniarnissamut qaaqquneqarsimapput.

Illuatungeriit tallimanngorneq decembarip aappaat nallertinnagu isumaqatigiissuteqanngippata suliumajunnaartoqassaaq, ilaasunillu angallassinissat tamarmik ullormiit tassannga unitsinneqassallutik, Air Greenlandimit ilisimatitsissutigineqarpoq.

Isumaqatiginninniarnerit novembarip qaammataata aallartinnerani unittoorsimapput, aaqqiagiinngissuteqarnerlu aaqqiiffigineqanngippat sapaatip-akunnerata siuliani suliumajunnaartoqarsinnaanera peqatigiiffimmit nalunaarutigineqarsimalluni. Maannalu suliumajunnaartoqarnissaanik nalunaaruteqartoqarsimavoq, illuatungeriillu isumaqatigiissuteqanngippata qaqugu suliumajunnaartoqassanersoq ullulerneqarsimalluni.

Ulloq nallertinnagu isumaqatigiissuteqartoqarnissaa neriuutigineqartoq

PPUmit Air Greenilandimillu neriuutigineqarpoq, juullikkunni suliumajunnaartoqarsinnaanera pinngitsoortinniarlugu qanittukkut isumaqatigiissuteqartoqarumaartoq.

- Air Greenlandimit maannamut isummersimanermit allaanerusumik isumaqarluni naapinneqarsinnaasuugutta qularutiginngilara isumaqatigiissuteqarsinnaalluta, juullikkunnilu suliumajunnaartoqarsinnaanera pinngitsoortillugu. Maanna immitsinnut eqqaasittariaqarpugut sooq isumaqatiginninniarluta issiaqatigiinnerluta. Sulisuttami silannakkut angallassinermi pisinnaatitaaffii qulakkeertussaavagut, aamma Kalaallit Nunaanut Kalaallillu Nunaanniit taamatullu Kalaallit Nunaanni inunnik timmisartuussinissamik suliassaq pingaarutilik isumagalugu, FPU-mi siulittaasup tullia Anders Mark Jensen oqarpoq.

Air Greenlandimi pisortaaneq Jacob Nitter Sørensen aamma isumalluarpoq.

- Uppernarsarsinnaavara, suliumajunnaartoqarnissaa pillugu aappassaanik ilisimatinneqarsimalluta, taamaammallu isumaqatigiissitsiniartarfimmut aggersarneqarsimalluta. Soorunami neriuutigaara, isumaqatigiissitsiniartarfimmi isumaqatigiissuteqarnissarput, taanna Sermitsiaq.AG-mut oqarpoq.

Piffissamik eqquinerlunneq

Jacob Nitter Sørensenip sapaatip-akunnerani matumani siusinnerusukkut oqaatiginikuuaa, nammineq isummani malillugu suliumajunnaartoqarnissaanik nalunaaruteqarneq piffissamik eqquinerluttuusoq.

- Soorunami Air Greenlandi Kalaallit Nunaanni attaveqaasersuutit pingaarutillit ilagaat, ullullu nalliuttut suliumajunnaarfissatut toqqarsimagaanni, ingerlatseqatigiiffimmut inuiaqatigiinnullu sakkortunerpaamik tatisinissaq siunertaasimassaaq, pisortaaneq sapaatip-akunnerani matumani siusinnerusukkut taamatut oqarpoq.

FPU-mili siulittaasup tulliata tamanna eqqunngilluinnartuunerarpaa.

- Juullernissaanut angallassinissat pingaarutillit eqqorneqarsinnaanerat pinngitsoortinniarlugu decembarip aappaani suliumajunnaartoqarnissaa nalunaarutigisimavarput. Air Greenlandimi tassaavoq aasaanerani isumaqatiginninniarnermik unitsitserusussimasoq isumaqatiginninniarnerillu nanginneqarnissaat kinguartissimallugu. Tamanna pissutaavoq maanna decembarimi killiffitsinnut. Air Greenlandimit oqaatigineqarsimavoq piffissamik naleqquttoqanngisaannartoq, taakkumi kissaatigisimagunarpaat isumaqatiginninniarnerit qaqugorsuarmut kinguartinneqarnissaat, taanna isornartorsiuilnermut taamatut akissuteqarpoq.

FPU-mit oqaatigineqarpoq, isumaqatiginninniarnermi aporfiit annersaasa ilagisimagaat, Air Greenlandip sulisut eqaannerusumik pilersaarusiortarnissaannik piumasaqarsimanera.

- Sulisut kiffaanngissuseqarnerat ingerlatseqatigiiffiup piumasaqaataanut illersorusuppavut. Air Greenlandimit piffissat qasuersaarfiusartut sivikillineqarnissaat ullullu sulinngiffeqarfiusartut ikilisinneqarnissaat piumasarineqarsimapput. Sulisut kattuffiattut tamanna akuersaarsinnaanngilarput, Anders Mark Jensen oqarpoq.

- Air Greenlandimit piumasaqaatigineqartut eqqarsaatigalugit aningaasarsiaritinneqartussatut neqeroorutigineqarsimasut itigartittariaqarsimavagut, ilaasortattami ineriartortinneqannginnissaannik tamanna isumaqarmat. Sulisitsisutut naleqquttumik akiliuteqarani piumasaqartoqarsinnaanngilaq, Anders Mark Jensen oqarpoq.

Kender ikke deres krav

Jacob Nitter Sørensen akerlianik isumaqarpoq, eqaannerulersitsinermut tamanna akigititassatut eqqortuusoq.

- Aningaasarsiat qaffaassutissaat piviusorsiortut neqeroorutigisimavagut eqaannerusumillu ingerlatsisoqartarnissaa kissaatigisimallugu, sulisummi sulinngiffissaminnik qanoq pilersaarusiorsinnaanerannut killeqartoqarmat, Jacob Nitter Sørensen oqarpoq.

Isumaqatigiissitsiniartarfimmi FPU-mit aalajangersimasumik piumasaqaatigineqartut aalajangersimasut paasisaqarfiginissai neriuutigaa.

- Isumaqatigiissuteqarsinnaanitsinnummi susoqartariaqarnersoq naluarput. Saqqummiussavut itigartitsissutigiinnarsimavaat, taamaammat isumaqatigiissitsiniartarfimmi ingerlaqqissinnaanerluta paasisaqarfiginissaa qilanaaraara.

Air Greenlandip saqisullu isumaqatigiissutaat siorna decembarip 31-ani atorunnaarpoq, taamanikkulli illuatungeriit isumaqatigiissutissamik nutaamik isumaqatiginninnialersimapput.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER