Air Greenlandimi ilaasut sapaatip-akunnerinik pingasunik kinguaattoortut

Air Greenland piffissami sivisunerusumi oqaaseqanngeriarluni, kiisami Avannaani sivisoorsuarmik kinguaattoorsimanerit arlallit uppernarsarpaat.

Uummannami, Qaarsuni nunaqarfinnilu eqqaaniittuni ilaasut amerlasuut ulluni 17-ini kinguuaattooqqasimapput, Air Greenlandillu aamma ullut 25-t tikillugit kinguuaattoornernik tusakkat uppernarsarsinnaannginnerpaa.

- Systemerput pissutigalugu, ilaasut ilaasa ullut 25-t tikillugit kinguuaattooqqasimasinnaanerat ilumuunnginnerarsinnaanngilarput, naalagaaffimmit aamma Namminersorlutik Oqartussanit ingerlatsivik ilaatigut pigineqartoq, ataasinngornermi ualikkut kingusissukkut Sermitsiaq.AG-mit apersorneqarluni taama ilisimatitsivoq.

Qulimiguulik ajoquteqartoq
Taamatut pisoqarnera qulimiguulimmik ajortissimasumik pissuteqarpoq, taannalu immikkut ittumik iluarsinissaa sivisusimavoq.

Sermitsiaq.AG siullermik januaarip 25-ani Sisimiunit ilaasumit kamattumit saaffigineqarpoq, taanna ernuttaminik Illorsuarnut inuuissiortooriarnermini Uummannami ullut qulingiluat sinnerlugit kinguaattooqqasimavoq.

Taamaakkaluartoq taanna ilaasoq iluatsitsisimavoq.

Ullut 25-t utaqqisoq
Tassami nukappiaqqap Uummannami illoqarfimmi qulimiguulimmut ilaanissani ullut 25-t utaqqisimagaa tusaamaneqarpoq. Taanna oqaluttuaq Uummannami ilaasunit allanit kinguaattoqqangaatsiarsimasuni taperserneqarpoq.

Ullunik 25-inik kinguaattoorsimaneq timmisartortitseqatigiit uppernarsarsinnaannginnerarpaat, sulisoq tusagassiortunut attaveqartartoq naapertorlugu, inniminniinermut systemip tamanna oqaatigiuminaallisimmagu.

Tallimanngormat Air Greenlandip helihopteria angalaleqqippoq, maannalu Uummannap eqqaani angallanneq aalajaalleqqippoq.

Pisussaanngikkaluartoq
Air Greenlandimit ullumikkut pisisartunut annertuumik utoqqatsissuteqartoqarpoq.

- Tamanna pisoq pitsaanerulersinniarlugu iliuusissaqanngilaq, tusagassiortunut attaveqarnermik suliaqartoq, Katrine Hjejlholt Nathanielsen Sermitsiaq.AG-mut oqarpoq.

- Kisiannili taama pisoqarpoq. Tamanna pisussaanngikkaluarpoq.

Qaqutigoortuunngilaq ullut tallimat arfinillilluunniit kinguaattoornermik tusagaqartarneq. Kisianni qanoq ililluni ilaasunik ulluni 25-ini kinguaattoortitsisoqarsinnaagami?

- Piffimmi tassani kiffartuussinissamik isumaqatigiissuteqarpugut (Uummannap eqqaani), tamannalu tamaviaarluta naammassiniarsaraarput. Qulimiguuliutitsinni qaqutigoortumik ajoquteqaleqqagatta, tusagassiinermik suliaqartoq oqarpoq.

Ajoqut qaqutigoortoq
Naalakkersuisunik kiffartuussinissamik isumaqateqarneq ingerlatsinermik aamma aningaasaqarnermik, timmisartortitseqatigiiffik piffimmi aalajangersimasoq qanoq timmisartuussissaneranik pisussaaffiliisuuvoq.

Air Greenland januaarip 13-ani ajutoornermut eqqugaavoq. Tassani qulimiguulik ajortippoq, mekanikerillu ajoqutaa paasiniarlugu aallartipput.

Atuaruk: Air Greenland rekordiliinerup kingorna: Akia apeqqutaavallaanngilaq

Kisianni ujaasineq sivisoorujussuuvoq, ajoqutaasoq qaqutigoortorujussuarmik inissisimammat, Katrine Hjelholt Nathanielsen oqarpoq.

Sapaatip-akunnera sinnerlugu qulimiguulik tamakkerlugu ajoqutaasumik ujaarleraluareernerup kingorna, qulimiguulik Ilulissanukaanniarlugu Air Greenland aalajangerpoq, tassani sulliviginnerummat.

Nunanit allanit ikiorneqartut
Ilulissani mekanikerit oqarasuaatikkut motoriliorfimmit ajoqutaasoq paasiniarnerani ikiorneqarpoq. Ullut 17-it ujaasereernerup kingorna tassani paasinarsivoq, ajoqutaasoq tassaasoq torque pendling, taanna aserorsimavoq - Timmisartortitseqatigiit naapertorlugit tamanna ajoqutaasoq qaqutigoortorujussuuvoq.

Air Greenlandip nammineq naatsorsorsimavaa, motorip ajornerata inuit 110-t kinguaattoqatissimagai.

Uummannap aamma Qaarsut akornanni inuit 38-t utaqqisimapput, Ilulissat aamma Qaarsut akornanni ilaasut 44-t eqqugaasimapput, nunaqarfinnillu ilaasussat 27-t motorip ajortissimasup angalanissaat ajoqusersorsimavaa.

Sikumi angallassisoqanngitsoq
Qaarsunit ilaannikkooriarluni sikukkut taxanik ingerlasoqartarpoq. Aamma qamuteralaqarlunilu piffimmi ingerlasartunik qimusseqarpoq. Sooruna sapaatip-akunnerini taakkunani allatut angallassinissamik Air Greenland aaqqissuussinngitsoq?

- Ilaasut tamarmik apuunnissaanut kisimi soqutigisaqarpugut. Kisianni angallassinermut immikkoortortaqarfipput naliliivoq, allatut angallassinissat tamarmik ajortut. Angallassineq ilaasoqarnissamut akuerisaasariaqarnera eqqaamaneqartariaqarpoq, tamanna nammineerluni angalanerunngimmat, Air Greenlandimi tusagassiisartoq oqarpoq.

Tamanna kinguartoorneq aatsaat taama ajortigaa?

- Naamik, taamaassorinngilara. Kangerlussuarmi ilaasut assersuutigalugu hunnorujulikkaat silarlunnera pissutigalugu kinguaattoqqanikuupput.

Atuaruk: Air Greenland S-61-imik nutaajunerusumik pisivoq

Ulluni 25-ini timmisartorniarluni kinguuaattoortumik tusarnikuunngisaannarpunga.

- Oqaatigisinnaanngilara sivisunerusumik kinguuaattooqqanikuusimanerluta. Kisianni tamanna ukiuni kingullerni kinguaattoornitta ajornersaasa ilagaat. Qeqertarsuup Tunuani 2014-imi qaqutigoortumik aperujussuarnera nalaapparput, tassani inuit illoqarfippassuarni nunaqarfippassuarnilu utaqqisariaqarsimapput, Katrine Hjelholt Nathanielsen eqqaamasalikkersaarpoq.

2014-imi juullikkunni angallanneq aatsaat iluamik ajorseriarpoq, taamanikkut angallat Air Greenlandimit attartorneqartoq, ilaasunik kinguaattoqanik ilaasoqartoq ikuallalermat.