Air Greenlandimi attaveqatigiinnermut pisortaq nutaaq
Air Greenlandip KNR-p aqutsisui attaveqatigiinnermut pisortassamik aallerfigaa
Masaana Egede 1. august 2019-imi Air Greenlandimi attaveqaqatigiinnermut pisortatut atorfinissaaq, Air Greenland tusagassiutinut taama nalunaaruteqarpoq.
Masaana 33-nik ukioqarpoq, KNR-imi radiumut pisortatut atorfimmiit
sulilertussaalluni. KNR-imi allannguinernut annertuunut siuttuusimavoq, tamannalu radiukkut tusarnaartartut iluarisimaarinninnerannik annertusititsisimavoq.
Masaana tusagassiortutut ilinniarsimavoq, 2015-imi KNR-ip pisortaanut ilanngunnissami tungaanut kalaallit danskillu tusagassiorfiini sulisimalluni.
Ukioq pissaganartoq
- Air Greenlandip ukiut nutaanik suliniuteqarfissat ornippai, tassanilu attaveqaatit maanna atuuttut ineriartortittussaavagut, tamatumalu peqatigisaanik pinngortussat piareersarfigisussaallugit. Tamanna ingerlatseqatigiiffiup iluani avataanilu attaveqaqatigiinnermut annertuunik piumasaqaateqarfiuvoq, Masaanalu tamatumunnga isumaginninnissamut tulluuppoq – tikilluaqqunissaanut
qilanaarpugut, pisortaaneq Jacob Nitter Sørensen oqarpoq.