Air Greenland: Allakkat nassiussallu kinguaattuussapput
Martsip 26-ata tungaanut allakkat nassiussallu kinguaattoortarsinnaaneri Air Greenland ilimasaarivoq.
Danmarkimiit nunatsinnut nassiussanik utaqqisaqaruit tikinnissaat kinguaattuussasut naatsorsuutigisariaqassavat. Air Greenlandimmi timmisartorsua, Norsaq, martsip 26-ata tungaanut aserfallatsaaliorlugu suliarineqarpoq.
Air Greenland tusagassiutinut taama nalunaaruteqarpoq.
Tamanna isumaqarpoq allakkat nassiussallu martsip 26-ata tungaanut nassiunneqartussat kinguaattoorsinnaasut.
Timmisartumik attartortut
Air Greenland ilanngullugu nalunaaruteqarpoq timmisartumik Norsatut allakkanik assartugassanillu nassataqarsinnaatigisumik attartornissaq periarfissaasimanngitsoq.
Timmisartoq attartorneqartoq Norsamiit amerlanerusunik issimasoqarsinnaavoq, timmisartulli sananeqarsimanera pissutaalluni allakkat nassiussallu ikinnerusut nassarneqarsinnaallutik, Air Greenland ilisimatitsivoq.
- Allakkanik nassiussanillu sullittakkatsinnut persaqusersuutaasinnaasut pillugit utoqqatsertorujussuuvugut. Kisiannili ullut tamaasa allakkanik nassiussanillu nassarsinnaasatsinnik annertusaajuarnissaq, taamaalillutalu sapinngisamik amerlanerpaanik nassarsinnaanissarput sulissutigigatsigu uppernarsarsinnaavarput, Air Greenlandimi Cargo manager, Tim Koop Jensen, tusagassiutinut nalunaarummi oqarpoq.
Kinguaattoornerusoqarsinnaavoq
Kisiannili allakkat nassiussallu suli kinguaattoorsinnaassapput, assersuutigalugu assorluni ingerlanermi imaluunniit silarlunnerani orsussamik annertunerusumik pisariaqartitsineq nassarsinnaasanik annikilliteqqinneqarsinnaammat, Air Greenland tusagassiutinut nalunaarummi ilisimatitsivoq.