Air Greenland: Akunnittarfinnut aningaasaliiniarpugut
Air Greenland akunnittarfinnut nutaanut aningaasaliinissamut aamma suleqateqalernissamut piareersimavoq, tamatuma takornariat amerlanerit unnuinissamut periarfissaqalernissaat qulakkiissavaa, timmisartornissamut bilitsit tunineqartartut amerlissappata, tamanna pisariaqartinneqarmat.
Air Greenlandip SAS-imut aamma danskit naalagaaffianut piginneqataanerannut inuulluaqqusivoq, tamannalu nutaamik aamma toraagaqarnerusumik kalaallinut inuiaqatigiinnut iluaqutaasussamik periusissiornissamut periarfissiivoq.
Siulersuisunut siulittaasoq Kjeld Zacho Jørgensen, Sermitsiaq.AG-mit apersorneqarnermini taama paasissutissiivoq.
SAS pingaarnertut niuerfimmik ukkatarinnissimavoq
- SAS pissusissamisoortunik tunngaveqarluni pingaarnertut niuerfik aamma sinneqartooruteqarnissaq ukkatarinikuuaa. Naalagaaffik akulerunnissamut annerusumik soqutiginnissuseqarpallaarani suleqataasutut inissisimasimavoq. Namminersorlutik Oqartussat maanna Air Greenland tamakkiisumik pigilermagu, kalaallit inuiaqatigiit ineriartornerat malillugu periusissiamik nutaamik aqqutissiorsinnaanngorpugut, Kjeld Zacho Jørgensen, Air Greenlandip siulersuisuini siulittaasunngornerminit ukioq ataasinngortorsiornermini taama nassuiaavoq.
- Soorunami timmisartuussineq ukkatarissarvarput, tassani suleriaatsit pitsanngoriaqqinnissaat pineqassaaq, taamaalilluni bilitsit akii apparneqarsinnaaniassammata. Kisianni siunissami suliaqarfik tamakkiisoq ukkatarinissaa aamma qularnanngilaq, Billund Lufthavnimi iluatsilluartumik pisortaasimasoq nassuiaavoq.
Akunnittarfimmik piginnittoq
Suliffeqarfissuup ullumikkut Hotel Arctic pigaa, taanna 2018-imi 4,2 millionit koruuninik sinneqartoorfiuvoq, naak akunnittarfimmi unnuisut ikinnerugaluartut aamma annerusumik aningaasaliissuteqartoqaraluartoq.
- Unnuiffissarsisoqarsinnaanngippat timmisartunut bilitsit amerlanerit tuninavianngilagut. Taamaattumik tamakkiisumik imaluunniit ilaannakortumik aningaasaliissuteqarnissatsinnut piareersimassaagut, unnuiffissat naammannissaat qulakkeerumallugit, siulersuisunut siulittaasoq oqarpoq.
- Aningaasaliinissatsinnut akissaqarpugut, taanna oqarpoq, ingerlatseqatigiiffiullu akiliisinnaassuseqarnerata procentianut innersuussilluni, taanna 38,7 procentimiippoq, timmisartortitseqatigiiffinnilu taanna qaffasippoq.
2018-imi takornariat ukiuni arlalinni amerliartoreerlutik ikilerialaarput. Takornariat namminneq tikiinnartannginnerannut tamanna mianersoqqussutaavoq.
Ammasumik qaaqqusissut
Hurtigruten Nuummi akunnittarfiliorniartoq assersuutigalugu oqaloqatiginikuuisiuk?
- Naagga, suli naamik. Kisianni oqaloqatiginissaat tulluarpoq. Aningaasaliisartullu allat Air Greenlandimik suleqateqarnissaq pitsaasutut isigippassuk, oqaloqatigiinnissamut piffissaliilluarsinnaavugut, siulersuisunut siulittaasoq taama qaaqqusivoq.
Periusissiaq nutaaq malersorniarlugu ingerlatseqatigiiffiup aaqqissuussaanera maanna allanngortinneqarnavianngitsoq oqaatigaa.
- Periusissiap aalajangersarnera suli piariinngilarput, tamannalu aatsaat ukiup naalernerani pissaaq. Kisianni ingerlatseqatigiiffimmi aaqqissuussaanerup allanngortinneqarnissaanik pisariaqartitsisoqarnavianngilaq. Akerlianik suliffeqarfiup qullersaattut ingerlatseqatigiiffinni piginneqataaffigisatsinni siulersuisunut kivitseqataanerorusuppugut, taamaalilluta qanoq pisoqarnissaanut annerusumik sunniuteqalissagatta, taamaalilluni pingaarnertut niuernitsinnut sunniuteqassalluni, tassaasalluni ilaasunik sumiiffimmit sumiiffimmut timmisartuussisarneq, Kjeld Zacho Jørgensen nassuiaavoq.
Tupaallanneq
Aktianik pisinermut atatillugu Air Greenlandip nalinganik aalajangersaaniarluni sulineq pissarsiaqarfiulluarsimasoq aamma tupaallaffiusimasoq, taassuma oqaatigaa.
- Assersuutigalugu timmisartortitseqatigiiffinnut allanut sanilliulluta ilaasutta akornanni sulinermut tunngasut takornarianit amerlanerusut paasinarsivoq. Tamanna tupaallaatigaarput. Niuerfimmik periarfissamik atorluarneqanngitsumik peqarneranik tamanna isumaqarpoq, tassanilu suliaqarnerulluta eqqortunik suleqateqassaagut, siulersuisuni siulittaasoq ilisimatitsivoq.
Timmisartortitseqatigiiffiup aamma attaveqarnini pitsanngorsartariaqaraa, digitalimillu niuerfiit nutaat isiginiartariaqarneri, Kjeld Zacho Jørgensenip qularutiginngilai.
Digitalimik ukkataqarneq
- Takornariat ullumikkut ikinngutiminnit Instagramimi aamma Facebookimi ivertittagaannik isumassarsiortinneqartarput. Tassanilu Kalaallit Nunaat qanoq tunniussassaqarnersoq pillugu pitsaasumik oqaluttuamut tapiliussaqarnissarput pingaaruteqarpoq, siulersuisunut siulittaasoq oqarpoq, ingerlatseqatigiiffiup ingerlaffia nutaaq ”tulluarluinnartoq” aamma ”naleqarnerulersitsisoq” taanna isumaqarpoq – Air Greenlandimuinnaanngitsoq, kisianni kalaallinut inuiaqatigiinnut tamanut.
- Siornatigut piginnittunut pingasunut siulersuisunut siulittaasuuvunga, tassanilu tamanut sullissinissara tassani pingaarnertut suliassarisimavara. Maanna piginnittumut ataasiinnarmut sullississaanga: Namminersorlutik Oqartussanut. Naaperiaanissamik pisariaqartitsinnginnermik tamanna kinguneqarpoq. Tamanna iluaqutissartaqarpoq, naak ukiuni tulliuttuni anguniakkagut anguniarlugit ilungersorluni sulisoqartussaagaluartoq. Kisianni tassani qujanartumik Air Greenlandimi pikkorilluinnartunik qullersaqarpugut, Kjeld Zacho Jørgensen oqarpoq, mittarfiit nutaat piareerpata taassuma unammillertit nutaat tikilluaqqulluinnarpai.