Air Greenland: Aktianik pisineq Kalaallit Nunaannut niuerluarneruvoq
Namminersorlutik Oqartussat maanna Air Greenlandimik 100 procentinik piginnittunngornera, kalaallinut inuiaqatigiinnut niuerluarnerunissaa, Air Greenlandimi siulersuisunut siulittaasup, Kjeld Zacho Jørgensenip qularutiginngilaa.
- Aktianik pisinerunersoq apeqquserusuppara. Tassami immaqa mumisillugu aktianik tunisinertut isigineqarsinnaavoq. SAS-ip ukiorpassuarni aktiaatini tunerusussimavai, ukiorlu ataaseqqissaap matuma siorna Air Greenlandimi siulittaasunngorama, danskit naalagaaffiat taama kissaateqarpoq, Kjeld Zacho Jørgensen ilisimatitsivoq.
Naalagaaffiup aktiaatiminik tunisinissamik kissaateqarnera aatsaat septembarimi 2018-imi tamanut saqqummiunneqarpoq, ministeriunerup Lars Løkke Rasmussenip mittarfinnut nutaanut aningaasaliinissamut pilersaarutinik saqqummiussiartorluni Nuummiinnerani tamanna pivoq.
Nammineq aningaasaatit ikileriarujussuartut
Taakku marluk aktiaataasa 461 millionit koruunilerneqarnerisa Air Greenlandip nammineq aningaasaataanik 717,9 millionit koruuninik ullumikkut 403,4 millionit koruuninut appariartitsinera, Kjeld Zacho Jørgensenip nassuiaateqarfigaa.
Timmisartortitseqatigiiffik tamatuma saniatigut 260 millionit koruuninik, ukiut sisamat qaangiuppata akilerneqartussanik taarsigassarsiaqarpoq.
- Tamanna annertugineqarsinnaavoq. Kisianni timmisartortitseqatigiiffiup nammineq aningaasaatai 2023/2024-imi 700 millionit koruuninngoqqinnissaat suliffeqarfimmut pilersaarutip takutikkaa ilisimatitsissutigisinnaavara, siulersuisunut siulittaasoq aalajangersimarpaluttumik nipeqarluni taama oqarpoq.
”Pitsaalluinnartoq”
- Ukiut sisamat qaangiuppata nammineq pigisatsinnik, piginnittut allat aktiaataat pisiarinngikkallaratsigit 37 procentiinnarmik piginngisatsinnit, taamatut nalilimmik ingerlatseqatigiiffeqalernissarput pitsaalluinnarpoq, siulersuisunut siulittaasoq oqarpoq.
Tassani maluginiarneqassaaq, Namminersorlutik Oqartussat ukiuni sisamani tulliuttuni iluanaarutinit piumasaqarniarnatik neriorsuuteqarnikuunerat, tassani siornatigut ukiumut naatsorsuutini akileraareernermi angusat affaat tunniunneqartaraluarput. 2018-imi ingerlatseqatigiiffik 52 millionit koruuninik angusaqarpoq, aningaasallu tamaasa tigummiinnarsinnaavai.
Nammineq aningaasaatit uterteqqinnissaannik anguniagaq anguniarlugu bilitsit akii qaffanneqassappat?
- Naagga. Niuernermut pilersaarummut tamanna ilaanngilaq. Akerlianik bilitsit akiisa apparneqarnissaat naatsorsuutigaarput. Suliarisinnaasatta tamakkiisumik atorluarneqarnissaata qulakkeernissaa ukkataraarput, siulersuisunut siulittaasoq aalajangersimalluinnarluni neriorsuivoq.
Niuerneq pitsanngorsarneqassaaq
Timmisartuussinermi niuernerup pitsanngorsarnissaanik suliap ingerlanera pingaarutilerujussuusoq, taassuma nassuerutigaa, qullersaqarfiullu tamanna tamakkiisumik ukkataraa.
- Timmisartut nunamiinnerat sivikinnerutillugu, aningaasat amerlanerit isertissinnaavagut. Aammattaaq issiaviit amerlassusaat qaffassavarput. Niuernitta pitsanngoriarnissaanut suliaqarfippassuit pitsanngorsaavigisassat amerlapput, siulersuisunut siulittaasoq nassuiaavoq, niuerfiillu qulingiluat, ingerlatseqatigiiffiup ullumikkut isertitaqarfigisai tikkuarlugit.