Air Greenland uulia akii pillugit: Bilitsit akitsorneranik kinguneqarsinnaavoq
Nunarsuaq tamakkerlugu uuliap akitsorneranik Air Greenland aamma eqqorneqarpoq. Timmisartorsuaq Danmarkimi orserneqartarpoq, Danmarkimilu massakkut uuliap akii qaffarujussuarnikuupput. PolarOil-ilu akit suli qaffanngilai.
Sapaatip akunnerata ingerlanerani Europami uuliap akia 32,8 procentimik qaffanneqarpoq. Tamannalu Air Greenlandimut aamma eqquisoq, pisortaq Jacob Nitter Sermitsiaq.AG-imut oqarpoq.
- Kalaallit Nunaata iluani orsiisarnerput Polaroilimeersuupput. Taamaammat tassuuna annertunerusumik eqqugaanngilagut. Timmisartorsuaq Danmarkiliartartoq Københavnimi orserneqartarpoq, taannalu nunarsuarmi uuliap akiata qaffannera malugeqaa.
Nunarsuarmi akigititat Ruslandimi Ukrainemilu pisunit annertuunik eqqugaapput. Nunarsuarmi uuliamik gassimillu tuniniaanermi Rusland siuttuuvoq.
Akit naleqqussarneqartariaqalersinnaapput
Air Greenlandip orsussanik pisisarnera annertunerpaamik atlantiku qulaallugu timmisartuussinermut atorneqartarput. Suliffeqarfiullu aningaasartuutaasa 30 procentiisa orsussamik pisinermut atorneqartarlutik.
- Soorunami akit qaffarujussuarnerat ingasaqaaq. Pisut malinnaaffigaagut, akit sivisuumik qaffasinnissaat peqataaffigisinnaanngilarput, taamaammat sivisuumik akit qaffasissappata taava akigititagut naleqqussarneqartariaqassapput, Jacob Nitter oqarpoq.
Taassuma oqaatigisinnaanngilaa qaqugu bilitsit qaffassinnaalissanersut, Ukrainemi aaqqiagiinnginneq apeqqutaalluinnarpoq.
- Nunarsuarmi akit qaffannerat annertunerusumik ilisimasariaqassavakka qanoq sivisutigisumik akit qaffasinnissaat paasisaqarfigissagukku. Soorunami atuisugut eqqorneqarnissaat pinngitsoortinniartussaavagut.