Skip to main content

Air Greenland taarsiissuteqartussanngorlugu pineqaatissinneqarsimasoq

Air Greenland ilaasut marluk 2018-imi timmisartoq ilaaffissaat kinguaattoormat, 8.930 koruuninik taarsiisussanngortillugu Københavns Byretimit pineqaatissinneqarsimavoq.

Sumiiffimmiit sumiiffimmut allamut angalanermi kinguaattoortoqarlunilu allamut ilaatinneqartussanngortinneqartarneq nalinginnaasuuvoq. Maani nunarsuulluunniit sinnerani tamanna atuuttarpoq. Taamaammat taamatut pisoqarnerani atuisut pitsaasu ik sullinneqartarnissaaq qulakkeerniarlugu malittarisassaliortoqarsimavoq.

Ilaannikkooriarlunili taamatut pisinnaatitaaffeqartut misigisimagaluarluni taarsiiffigitinniarneq ajornarsinnaasarpoq. Olafur P. Nielsen 2018-imi Danmarkimiit Nuummut timmisartumik angalanerminut atatillugu taarsiiffigitinnissamik suliakkiummini ajugaaqqammersoq taamatut oqaluttuarpoq.

Københavnimi pisattanik tunniussinermili paasinarsisimavoq, Kangerlussuarmiit Nuummut angerlarluni angalanissaq allanngortinneqarsimasoq.

Nalunaaquttap-akunnerini arfineq-pingasuni kinguaattoorneq

Olafur P. Nielsen nulianilu nalunaaqutaq 10.25 aallartussaagaluarlutik timmisartoq kingusinnerusukkut, tassa nalunaaqutaq 18.45 ilaaffigisussanngorsimavaat, tassa pilersaarutaasumit nalunaaquttap-akunneri arfineq-pingasut sinnerlugit kingusinnerusukkut aallartussanngorsimapput.

Københavnimiit Nuummut timmisartukkut ingerlaarfissaq 3.500 km-it sinnerlugit isorartussuseqarmat aamma kinguaattoorneq nalunaaquttap-akunneri pingasut sinnerlugit sivisussuseqarmat, Olafur P. Nielsen isumaqarsimavoq, timmisartumi ilaasussat aallalernermi ikinissamut itigartinneqarsimasut aamma aallarfissat taamaatiinnarneqarneranni imaluunniit piffissami sivisuumi kinguaattoorneranni taarsiiffigitinnissamik ataatsimut aalajangersakkat pillugut EU-p peqqussutaa naapertorlugu nammineq nulianilu taarsiiffigitittariaqarlutik.

- Taamaammat ulloq 8. september 2018 Air Greenlandimut saaffiginnippunga taarsiiffigitinnissarpullug qinnutigalugu. Ulloq 20. september 2018 Air Greeland akissuteqarluni allappoq piumasaqaaterput itigartitsissutigisimallugu.
 

Tunngavilersuut siulleq itigartinneqarsimasoq

Air Greenlandip taarsiiffigitinnissamik qinnuteqaammik itigartitsigami tunngavilersuutigisimavaa:

- Air Greenland taamaallaat EU-mi nunamiit aallartoqarsimatillugu peqqussummut 261/2004-mut ilaatinneqarpoq. Nunat allat akornanni imaluunniit nunamit allamiit EU-mukarnermi peqqussut uagutsinnut atuutsinneqanngilaq.

Suliaq tassanili naammassineqareersimasinnaangaluarpoq, Olafur P. Nielsenilli suliffeqarfik flypenge.dk, ilaasunik timmiasertuutileqatigiiffinnit ikiorserneqarusunngitsunik ikiorsiisarnermik immikkut ilisimasalik saaffigisimavaa.

- Flypenge.dk-p suliaq naliliiffigisimavaa, ilisimatillutalu Air Greenlandip taarsiissuteqartinneqarnissaa - ajornanngitsumik isumagineqarsinnaasoq.

Nassuiaatit arlallit

Suliarli imaaliallaannaq naammassineqarsinnaasimanngilaq.

Air Greenlandip aallaqqaammut suliaq EU-mi peqqussummut attuumassuteqannginnerarsimavaa. Paasinarsimmalli angalanerat peqqussummut attuumassuteqartoq, Air Greenlandip tunngavilersuutigisimavaa, Olafur P. Nielsenip timmisartoq ilaaffissaralua immikkut illuinnartumik pisoqarsimanera pissutigalugu taamaatiinnarneqarsimasoq, tassa timmisartoq napparsimasumik aallarussigasuarnissamut atorneqartussaasimasoq.

Air Greenlandip Sermitsiaq.AG-mut ilisimatitsissutigaa, inuunermik ulorianartorsiortoqartillugu Dash 8-t pilersaarutaasutut ingerlaaffissaat atorunnaarsillugit aallarussigasuarnermut taamaallaat atorneqartartut. Air Greenlandilli kinguaattoornermut taarsiissuteqannginnissamut tamanna tunngavilersuutigisinnaanngikkaa, Københavns Byret decembarip qaammataani aalajangiisimavoq.

Toqqaannartumik attaveqartoqartarnissaanik kaammattuisut

Air Greenland suliamut pineqartut atatillugu oqaaseqarsinnaannginnerapoq, Sermitsiaq.AG-mulli ilisimatitsissutigalugu, timmisartunik ilaaniartunut kaammattuutigineqartoq kinguaattoortoqarnerani taamaatitsiinnartoqarneraniluunniit taarsiiffigitinnissamut tunngassuteqartut pillugit toqqaannartumik timmisartuutileqatigiiffik saaffigineqartassasoq.

- AG-mi sullitanik toqqaannartumik oqaloqateqartarnissaq pingaartipparput, taamaammat Sullitanik kiffartuussivitta toqqaannartumik attaveqarfigineqartarnissaa inassutigaarput, tassuunakkummi angalaffissat ataasiakkaat taamaatiinnarneqarneranni pisinnaatitaaffiit pillugit pitsaanerpaamik siunnersorneqarnissaq pisariaqarmat, EU-miimmi EU-llu iluani angalanerit apeqqutaallutik imaluunniit Kalaallit Nunaata iluani angalasoqarnersoq apeqqutaalluni malittarisassat assigiinngitsuupput, Air Greenland Sermitsiaq.AG-mut allakkatigut akissuteqarluni allappoq.

Tamannali Olafur P. Nielsenimut naammassimanngilaq, timmisartorfigisassaatalu kinguaattoorsimaneranit ukiut arlallit qaangiummata aatsaat, Air Greenland taarsiissuteqartariaqartoq eqqartuussivimmit aalajangerneqarpoq.

Sermitsiaq.AG-mit suliat arlallit ilisimaneqarput, tassani inuit flypenge.dk aqqutigalugu Air Greenlandimit taarsiiffigineqartarsimapput.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER