Air Greenland suliumajunnaartoqassappat bilitsit pillugit: Utertinneqarsinnaapput allanngortinneqarsinnaallutilluunniit
Suliumajunnaarnissaq FPU-mit Air Greenlandimut ilimasaarutigineqartoq2022-mi decembarip aappaani aallartissappat Air Greenland billetsinikeqqugaasunik tamanik utertitsinissaminut piareersimassaaq. Ilaasussat aamma allammut ilaanissaq toqqarsinnaavat imaluunnit maannakkumiit inniminniisimanertik atorunnaarsissinnaavaat.
Suliumajunnaartoqassappat juullimi sulinngiffeqarnissaq ajutoorutigineqarsinnaavoq.
Air Greenlandili FPU-lu saqisut pillugit isumaqatiginninniarnermi nutaamik isumaqatigiissuteqarsinnaannginnerat pillugu marlunngornermi isumaqatigiissitsiniartarfimmi naapikkunik aaqqiissuteqarnissamut periarfissaqarput. Isumaqatigiissinnaanngippatali FPU-p nalunaarutigisimasaatut decembarip aappaani suliumajunnaartoqassaaq.
Air Greenlandimi saqisut suliumajunnaassappata Kalaallit Nunaannut Kalaallillu Nunaanniit aamma Kalaallit Nunaanni decembarip aappaaniit angallassinissat tamarmik unitsinneqassapput.
Suliumajunnaartoqassagaluarpat timmisartuussinissamut billetsit eqqorneqartut qanorluunniit ittuugaluartut utertinneqassapput, Air Greenlandimit nalunaarutigineqarpoq. Inuppassuuppullu juullikkunni sulinngiffeqarnissaminnut atatillugu ernummateqartut.
Allanngortitsisinnaasut utaqqisinnaasulluunniit
Air Greenlandip saqisut suliumajunnaassappata piffissaq eqqorlugu ornitassamut apuussinissamik qularnaarinnissinnaannginnera pissutissaqarluarpoq, sisamanngornermili suliumajunnaartoqassappat bilitsit qanoq pineqassanersut aalajangiiffigineqarsimavoq.
Air Greenlandimit ilisimatitsissutigineqarpoq, bilitsimik pisiaqarsimasut utertitsinissaq allannguinissarluunniit maannangaaq aalajangereersinnaagaat.
Bilitsit imatut iliuuseqarfigineqarsinnaapput:
- Pisisartut piffissami 2022-mi decembarip aappaaniit 16-iat ilanngullugu angalasussat suliumajunnaartoqassagaluarpat suliumajunnaartoqassanngikkaluarpalluunniit apeqqutaatinnagu billetsiminnik utertitsisinnaalereerput. Pisisartup neqeroorut
akuerisimaguniuk suliumajunnaartoqanngitsoorpallu angalaniarluni aalajangeruni niuernermi atugassarititaasut nalinginnaasut naapertorlugit nutaamik billetsisisariaqarnissani eqqumaffigissavaa. Billetsimik utertitsinissamut
qinnuteqarniarlutit immersugassaq una atorlugu Atuisunut sullissivimmut saaffiginnigit:
https://kundeservice.airgreenland.gl/hc/da/requests/new -
Pisisartut 2022-mi decembarip aappaaniit 16-iat ilanngullugu angalasussaagunik ulloq alla angalasinnaanissaminnut billetsertik allanngortissinnaalereerpaat. Allannguineq aqqummi angalaffissami taamaallaat atorsinnaavoq, aammalu piffissami 2022-mi decembarimi, 2023-mi januaarimi imaluunniit 2023-mi februaarimi taamaallaat atuuppoq. Maluginiaqquneqarpoq juullilernerani sap. Ak. 51-imi angallassinissani amerlanerpaani inissat ikitsuinnanngormata. Atuisunut sullissivik immersugassaq
una: https://kundeservice.airgreenland.gl/hc/da/requests/new atorlugu allannguinissamut saaffiginnissutit tulleriiaarneri malillugit TAAMAALLAAT sullississaaq - Billetsit angallassinissamut sullissisumiit pisiarisimagukku taanna utertitsinissaq allannguinissarluunniit pillugu saaffigissavat.
Aningaasanik utertitsineq aningaaserivimmut korti sorliunersoq apeqqutaalluni sapaatip-akunnera ataatsimiit arfinillit angullugit sivisussuseqarsinnaavoq, Air Greenlandimit ilisimatitsipput.