Air Greenland suliumajunnaartoqarnissaanik nalunaarut pillugu: Juullikkunni angallannermut akornusiisinnaavoq
Air Greenlandimi saqisut isumaqatigiissutissaannik nutaamik isumaqatiginninniarneq unittoorsimavoq, timmisartortitseqatigiiffillu suliumajunnaartoqarnissaanik nalunaarummik siullermik tigusaqarsimalluni. Suliumajunnaartoqassappat juullikkunni angallanneq akornuserneqarsinnaavoq, isumaqatiginninniarnermik aqutsisoq oqarpoq.
Air Greenlandip saqisullu isumaqatigiissutaat siornali decembarip 31-ani atorunnaarpoq, illuatungeriillu tamatuma kingornatigut isumaqatiginninnialersimapput.
Isumaqatiginninniarnerilli kinguneqarsimanngillat, Air Greenlandilu suliumajunnaartoqarnissaanik nalunaarummik siullermik saqisut kattuffiannit Flyvebranchens Personale Union-imit, FPU, tigusaqarsimalluni, Air Greenlandimit tusagassiorfitsigut nalunaaruteqarnermi ilisimatitsissutigineqarpoq.
Air Greenlandimit oqaatigineqarpoq, suliffeqarfimmit neqeroorutit arlallit saqqummiunneqarsimasut, illuatungiliuttunilli tamarmik itigartitsissutigineqarsimasut. Timmisartortitseqatigiiffimmit aamma oqaatigineqarpoq, timmisartorsuit mittarfissaat nutaat eqqarsaatigalugit aningaasartuuteqarnaveersaartoqarnissaanik kissaateqartoqarsimasoq, tassa Air Greenlandi ingerlatseqatigiiffinnit allanit unammillerneqartussatut naatsorsuuteqarmat.
Air Greenland: Aningaasarsiat eqaannerusumik qaffaaffigineqassasut
Air Greenland sinnerlugu isumaqatiginninniarnermi aqutsisoq Sulisoqarnermut pisortaq Mads B. Christenseni oqarpoq, Air Greenlandimi aningaasarsiat piffissaq ungasinnerusoq eqqarsaatigalugu unammillersinnaasuseqarnissaat anguniagaasoq.
- Isumaqatigiissutigullu ullumikkut atuuttut qaffasissumik inissisimareermata FPU-mik isumaqatigiinniarneq immikkut ittumik ajornakusoorpoq.
- Neqeroorutigisatsinni sulinissamik pilersaarusiornitsinni ullumikkumiit eqaannerusumik pilersaarusiorsinnaajumalluta akissarsiatigut qaffaanissamik piviusorsiortumik kissaateqarpugut, Mads B. Christensen oqarpoq.
Pisortaanerup Jacob Nitter Sørensenip ilimagaa, suliumajunnaartoqassappat juullikkunni angallanneq akornuserneqarsinnaasoq.
Juullikkunni angallannermut akornusersinnaasoq
- Ukiuni marlunni kingullerni angalasut Corona pissutigalugu juullisioriarnerinik kalluarneqangaatsiareersullu FPU-mit suliumajunnaartoqarnissaanik aappassaanik nalunaarut juullisiorianik angallassinitta nalaani takkuteratarsinnaavoq, tamannalu ajuusaarutigeqaara.
- Isumaqatigiissuteqarnissarput, taamaalillutalu akerleriilinnginnissarput, soorunami neriuutigaara, Jacob Nitter Sørensen oqarpoq.
Air Greenlandimit oqaatigineqarpoq, FPU suliumajunnaartoqarnissaanik aappassaanik nalunaaruteqarpat/nalunaaruteqassappat Forligsinstitutionenimi isumaqatigiissuteqartoqanngippat ullut arfineq-marluk qaangiuppata akerleriinneq atuutilissasoq.
Ukioq manna aappassaanik suliumajunnaartoqarnissaanik nalunaaruteqartoqartoq
Suliumajunnaartoqassappat Air Greenlandip timmisartuussinissat tamaasa taamaatillugillu billetsinut akiliutaasut utertillugilluunniit billetsit allanngortissavai.
Sermitsiaq.AG-mit Flyvebranchens Personale Unionimeersut oqaaseqartinniarneqarput.
Ukioq manna siusinnerusukkut aamma Air Greenlandimi aaqqiagiinngitsoqarpoq. Dansk Metal timmisartunut mekanikrit pitsaanerusumik aningaasarsiaqartilerusullugit suliumajunnaartinneqarnissaannik nalunaaruteqarmat.
Illuatungeriilli isumaqatigiissitsiniartarfimmi aaqqiissuteqarlutik isumaqatigiissuteqarsinnaasimapput.