silarluk
Air Greenland silarlunneranit ima eqqorneqarpoq
Silaannakkut angallassinerit ingerlanneqaqqilissapput kinguaattoorlutik ataasinngornermi. Nunatta kujataanili silap atoruminannginnera pissutaalluni angallassisoqassanngilaq
Nuummi aputeqartorujussuuvoq, perserluni issillunilu. Aamma aqqusinikkut angallattut tattoqiupput. Pisariaqavissumik aqqusinikkut angallattoqannginnissaanik Nuummi politiit oqariartuutertik uterteqqippaaat. Air Greenlandili pitsaanerusunik nutaarsiassaqarpoq.
- Nuummi anorlernera sakkukilliartorpoq ataasinngornerup ullaavani. Silaannakkut angallassineq ingerlanneqaqqilissaaq kinguaattoorfiusumik. Silaannakkut angallassinissalli ilaat aamma unitsiinnarneqarsinnaapput, Air Greenlandimi tusagassiuutinut nalunaarutini akisussaasoq Katrine Hjelholt Nathanielsen nalunaarpoq.
- Kujataani silarloqattaarpoq sapaatit akunnerini marlunni kingullerni. Narsarsuami aamma kujataata tamaani sila pissutaalluni silaannakkut angallassisoqassanngilaq ullumi ataasinngornermi, Sermitsiaq.AG-mut nassuiaavoq.
Angalasussat tamarmik pilersaarutinik malinnaasinnaapput airgreenland.gl-mi tekst-tv-kullu. Air Greenlandip aamma ilaasussat oqarasuaatinut angallattakkalinnut sms-ikkut nassiussissapput.