Air Greenland S-61-imik nutaajunerusumik pisivoq

2015-imi upernaakkut Forsvarskommandop Kalaallit Nunaanni SAR-imik ingerlatsineq EU-mi suliarinnittussarsiuuppaa. Air Greenland suliarinnittussarsiuussinermi ajugaavoq, septembarillu 22-anni SAR-imik isumaqatigiissut Air Greenlandip Forsvarskommandomik atsioqatigaa.

Taamatut Air Greenland tusagassiorfinnut nalunaarutikkut paasissutissiivoq.

Tamatuma kingunerisaanik Air Greenland 2016-imi 2017-imilu SAR-imik helikopterinik ingerlatsinini nangiinnassavaa, taannalu ukioq ataaseq sivitsoqqinneqarsinnaavoq.

Air Greenlandip ukiorpaalunni SAR-imik isumaqatigiissut tigummisimavaa, maannalu SAR-ip suliarinnittussarsiuunneqarnerani aappassaanik ajugaavoq, pisortaaneq Michael Højgaard oqarpoq.

S-61-imik nutaamik pisivoq

SAR-imik isumaqatigiissummut atatillugu Air Greenland helikopterimut S-61-imut nutaajunerusumut, SAR-imik ingerlatsinermi atorneqartussamut, aningaasaliissuteqarpoq.

Helikopteri siusinnerusukkut Irish Coast Guardimit atorneqarsimavoq, selskabillu helikopteriinit S-61-init assigiinngissutigaa SAR-imi atorneqartussatut allanngortinneqarsimammat.

Immikkut benzinamut tankeqarami, silataatigut amoortaateqarluni kiisalu nutaaliarujussuarmik autopiloteqarluni helikopteri Search and Rescuemi suliassanut pitsaanerujussuarmik atortulersugaavoq.

2011-mi Air Greenland nalunaarsimagaluarpoq helikopteritoqqat sikorsky-t, upalungaarsimanermi atorneqartut allarluinnarnik taarserneqasssut.

S61 nutaaq naatsorsuutigineqarpoq 2016-imi januaarip aallaqqaataani atulissasoq.