Air Greenland qulimiguulinnut nutaanut aningaasaliinissaminut piareersimasoq
- Airbusinik kiffartuussilluarnerusinnaasunik qulimiguulinnik siunniussaqarpugut. Air Greenlandip pisortaa Jacob Nitter Sørensen qulimiguulinnik EC155-inik Airbusineersunik ilaasunik kiffartuussinissamut isumaqatigiissummut, ukioq manna inissittussamut, taama innersuusserusuppoq. Ajornanngippat piaarnerpaamik, taanna oqarpoq.
Kiffartuussinissamut isumaqatigiissutit nutaat ukioq ataaseq qaangiuppat januaarip 1-ani 2020-mi atuutileriissapput. Air Greenland angallassinermi kiffartuussinissamut isumaqatigiissutinik pitsaanerusunik soqutiginnittorujussuuvoq
Aviisi Sermitsiaq taama allappoq.
- Ilaasutulli angallannerup ingerlalluannginnera nuannarinngilarput, aamma silamik teknikkimilluunniit pissuteqartumik timmisartuussisinnaasannginnerput nuannarinngilarput. Sulisuvut tamarmik ilaasut ornigassaminnut bilitsitik naapertorlugit pilersaarutigineqartutut apuuttarnissaannik sapinngisamik pitsaanerpaamik iliuuseqarnissamik soqutigisaqarput, Air Greenlandip pisortaa Jacob Nitter Sørensen erseqqissaavoq, taanna aallaqqaammut 2017-imi maajimiit 2018-imi januaarip tungaanut pisortaagallarsinnarluni pisortanngorsimavoq.
Tamanna sioqqullugu timmisartuussinermut psiortaavoq, tamannalu tunngavigalugu kiffartuussinissamut isumaqatigiissuni, januaarip 1-ani 2017-imi atuutilersuni, aamma peqataasimalluni.
Qulimiguullit pitsaanerit
Air Greenland kiffartuussinissamut isumaqatigiissutini nutaani pitsaanerusunik qulimiguulinnik peqalerusuppoq, sukkanerusumik angallassasinnaasunik, initunerusunik, pitsaanerusumik sumiissusersiuteqartumik autopilotimullu attavilerneqarsinnaasumik. Suliffeqarfiup innersuussutigerusuppaa Airbus qulimiguulik EC155.
Aviisimi Sermitsiami, uani pissarsiarisinnaasanni, atuarnerusinnaavutit: