Air Greenland Pituffimmik atuisinnaanngortoq

Timmisartuutileqatigiiffiup Pituffik mittarfittut pilersaarutaasumik qinigassatut atorsinnaalissavaa, taamaalilluni Avannaani pitsaanerusumik angallassisoqarsinnaalissalluni.

Air Greenlandip Pituffimmi kiffartuussinermut isumaqatigiissummi isumaqatigiissutit ataatsimoortut aqqutigalugit Avannaanut timmisartuussinermi Pituffik mittarfittut pilersaarutaasumik qinigassatut atorsinnaalissavaa.

Mittarfik Amerikami ´Department of the Air Forcep´ kisimi miffigisinnaagaluarpaa.

Isumaqatigiissuteqarnikkut assartuisarneq ilaasunillu angallassisarneq periarfissagissaarnerulissaaq:

- Ukiorpassuit ingerlanerini Thule Air Base aamma USAF suleqatigilluartorujussuusimavagut. Taamaattumik Thule Air Base-p mittarfittut pilersaarutaasumik qinigassatut atorneqarnissaa pillugu aamma suleqatigiissinnaagatta nuannerpoq. Tamatuma isumarpiaa tassaavoq, Qaanaamut ilaasut, allakkat nassiussallu amerlanerusut assartorsinnaaleratsigit, tamatumunngalu peqatigitillugu silarlutsillugu timmisartuussinerup sunnertianera annikillisussaasoq, Air Greenlandimi pisortaaneq Jacob Nitter Sørensen oqarpoq.

Pissutsit pitsaanerulissasut

- Akuersissutip atuutilerneratigut Air Greenlandip Qaanaamut timmisartuussinermini arlaannik naatsorsuutiginngisamik peqquteqarluni missinnaatinnani Pituffik mittarfittut pilersaarutaasumik qinigassatut atorsinnaavaa. Maannamut timmisartuussinerni taakkunani mittarfiit kujasinnerusut qinigassatut atorneqarnissaat pisariaqartarsimavoq, tamatumalu kingunerisaanik oqimaassutsit killeqartinneqartarput, taamatut pisoqartillugu ikummatissaq annertooq usineqartariaqartarmat, Namminersorlutik Oqartussat tusagassiorfinnut nalunaaruteqarlutik ilisimatitsipput.

Pituffik Qaanaamut qanittumi inissisimavoq, taamaalillunilu Kalaallit Nunaata avannaanut angallassineq pitsaanerulissaaq, ilaatigullu piffissamik eqquisinnaaneq annertusissaaq angallavillu tutsuiginarnerulissalluni.

- Aaqqiissutissamik inissiisoqarnera nuannaarutigaara. Taamaalilluni Qaanaamut angallavimmi, kiffartuussinermut isumaqatigiissuteqarfiusumi angalasunut pissutsit pitsaanerulersissinnaavagut aammalu Kalaallit Nunaata avannaa tamakkerlugu angallassineq patajaannerulissalluni, Attaveqaasersuutinut Naalakkersuisoq Naaja Nathanielsen (IA) oqarpoq.

Akuersissuteqarnermi Air Greenlandip aamma Pituffiup akornanni suleqatigiinneq pioreersoq ineriartorteqqinneqarpoq.

Powered by Labrador CMS