Air Greenland nassiussassanik immikkut timmisartuussilerpoq

Allakkat nassiussassallu Københavnimiit Kangerlussuarmukartussat amerlammata Air Greenland immikkut arfininngornermi juunip 12-ani timmisartuussiniarluni aalajangerpoq.

Kronprinsfamilien i Grønland, Air Greenland, Nuuk Lufthavn

Air Greenland maanna sapaatip akunneranut pingasoriarluni imarpik qulaallugu timmisartuussisarpoq. Allakkat nassiussassallu ilaasoqarluni timmisartuussinermi inissaarunneqartarput. Taamaammat timmisartortitseqatigiiffiup immikkut nassiussassanut arfininngornermi timmisartuusiniarpoq.

- Ilisimavarput sullitatsinnut aamma TELE-POST-ip sullitaanut allakkat nassiussallu piaartumik apuunnissaat qanoq pingaaruteqartigisoq, massakkullu allakkat nassiussallu amerlinerat malunnarmat, arfininngorpat immikkut allakkanik nassiussanillu timmisartuussinissaq aalajangerparput, niueqateqarnermut pisortaq Henrik Søe oqarpoq.

Timmisartuussinermi ilaasut nunatsinnukartut amerlassusaat killeqarmat arfininngorpat timmisartuussineq ilaasoqarnani pissasoq, nassiussat allakkallu kisiisa nassarneqassasut, timmisartortitseqatigiiffik allappoq.

Corona pillugu maleruaqqusat kinguaatoortitsisut

Nunatsinnut allakkat nassiussassallu amerlariarnerat Tele-Postip nalunaarutiginikuuaa. Taamaakkaluartorlu timmisartortitseqatigiiffiup allakkat nassiussassallu sapaatip akunneranut pingasoriarlutik timmisartuusisarnerminni tamaasa nassarsinnaaneq ajorpai. Taamaammat aamma immikkut timmisartuussisoqarnissaa Air Greenlandip aalajangersimagaa, timmisartortitseqatigiiffik paasissutissiivoq.

- Air Greenlandip allakkanik nassiussanillu immikkut timmisartuussiniarluni aalajangernera nuannaarutigaarput, suleqatigiinnitsigullu allakkat nassiussallu nunatsinni tigusisussanut tamanut apuunnissaat qulakkiissavarput, Tele-mi pisortaaneq Kristian Reinert oqarpoq.

Allakkat nassiussassallu kinguaatoortarneranit ilaatigut angerlarsimaffeqanngitsut aviisiat, Hus Forbi eqqugaaqqavoq. Hus Forbi-mi sapaatit akunnerini pingasuni sisamaniluunniit maanna kinguaatooqqasarpoq. Københavnimiit Kangerlussuarmut timmisartuussinerit corona pillugu ikilinikuunerisa peqqutaalluni.

Hus Forbi atuagassiaavoq pissakinnerusuniillu aviisi Nuummi tuniniarneqartarluni. Kofoed Skole aviisinik agguaasisuusarpoq, Air Greenlandilu aviisip nassiunneqarneranut aningaasaliisuusarluni.

Powered by Labrador CMS