Air Greenland nalunaaquttap ingerlaqatigiiffiinik allannguiniarneq pillugu: Silaannakkut angallassinermut arlalitsigut iluaqutitaqassaaq
Nalunaaquttap Europap kitaanut nikingassutaa tre tiimiinnanngortinneqartuuppat, Air Greenlandimut pitsaasunik arlalitsigut sunniuteqassaaq, pisortaaneq tusarniaanermut akissuteqarnermini oqarpoq.
Kalaallit Nunaata "Nalunaaquttap aalajangersarneqarnera" danskit naalagaaffiannit tigussavaa, Naalakkersuisullu tassunga atatillugu nunap annersaani nalunaaquttap ingerlaqatigiiffia allanngortinniarpaat, tassa Danmarkimut nalunaaquttap nikingassutaa tre tiimiinnanngortillugu.
Nalunaaquttap ingiaqatigiiffia nalinginnaasoq UTC -3-miit UTC -2-mut nuunneqassasoq siunnersuutigineaqarpoq.
Siunnersuut Air Greenlandimit tapersersorneqarpoq, timmisartortitseqatigiiffimmit oqaatigineqarpoq, nalunaaquttap ingiaqatigiiffia allanngortinneqartuuppat, tamanna ingerlatseqatigiiffimmut arlalitsigut iluaqutitaqassasoq. Air Greenland naapertorlugu, iluaqutaasussat timmisatortitseqatigiiffinnut allanut, siunissami nunami maani angallassisartussanut aamma iluaqutaassasut.
Ilaatigut tassani pineqarpoq Air Greenlandip timmisartuutaa imarpik ikaarlugu angallassisartoq, tassani sineriammi silarlutsillugu ilaasussat annikinnerusunik persaqqusersorneqartassammata:
Pisortaaneq: Sullitat annikinnerusunik persaqqusersorneqartassapput
- Assersuutigalugu sineriammi silarlutsillugu timmisartorsuup imarpik qulaallugu angallassisartup timmisartut nunami maani angallassisut utaqqeqqaartariaqartarunnaassavai, taamalu angallassinissap tullianut kingunerluutitaqannginnerusumik aallajaarnerusalissalluni. Tamanna aamma sullitanut annikinnerusunik persaqqusersuisassaaq, Air Greenlandimi pisortaaneq Jacob NitterSørnesen allappoq, nangillunilu:
- Ullumikkut taamatut pisoqartillugu timmisartorsuarmi inuttat Kangerlussuarmiit Københavnimut aallartinnatik minnerpaamik nalunaaquttap-akunnerini 14-ini qasuersaaqqaartussaapput. Ullumikkullu timmisartorsuarmi inuttat Københavnimut tikinnerminnil aallaqqitsinnatik minnerpaamik unnunni pingasuni qasuersaartussaallutik.
- Nalunaaquttap-akunnerinik pingasuinnarnik nalunaaqutaq nikingalersinneqarpata, timmisartorsuaq Kangerlussuarmi nalunaaquttap-akunnerini quliinnarni utaqqisalissagaluarpoq, taamalu timmisartumi inuttat aallaqqitsinnatik unnuk ataasiinnaq qasuersaarsinnaalissallutik. Tamanna sullitanut iluaqutaassaaq ingerlatseqatigiiffillu eqaannerusumik sullissilissalluni.
Piffissami sivisunerusumi "allaffissorsinnaalissasut"
Pisortaanerup aamma oqaatigaa, Air Greenlandimi timmisartortartut sungiusartarnerisa annersaat Europami ingerlanneqartartoq, taamaammallu nalunaaquttap ingiaqatigiiffiata allanngortinneqarneratigut pilersaarusiortarneq iluaquserneqassasoq.
Jacob Nitter Sørenseip oqaatigaa, nalunaaquttap ingiaqatigiiffia allanngortinneqarpat, kitaanut timmisartuussisarneq aamma iluaquserneqassasoq:
- Nuummi Ilulissanilu timmisartoqarfissat nutaat eqqarsaatigalugit, tamatuma aamma Amerikap Avannaanut timmisartuussisinnaaneq ammaatissavaa, siunnersuullu taamaallluni aamma suliffeqarfiutilinnut iluaqutaassalluni. Nalunaaqutaq Europamut 3 tiimiinnarnik nikangalertuuppat aamma Amerikap Avannaata kangianut 3 tiimiinnarnik nikingalertuuppat, timmisartumi sulisut Amerikap Avannaanut Europamullu nalunaaquttap-akunneri sisamat iluini Amerikap Avannaanut Europamullu angallassisinnaalissagaluarput, Jacob Nitter Sørensen allappoq.
Pisortaanerup naggasiullugu oqaatigaa, piffissamik allannguinikkut Danmarkimi silaannakkut angallassisarnermi oqartussanut attaveqartarneq eqqarsaatigalugu, "allaffissornermi" immikkut nalunaaquttap-akunneranik ataatsimik piffissaqarnerulertoqassasoq.
Sulisitsisut tapersiisut
Kalaallit Nunaanni Sulisitsisut tusarniaanermut akissuteqarlutik naatsumik allapput, nunarsuami nalunaaquttap ingiaqatigiiffiata allanngortinneqarnissaanik siunnersuut kattuffimmit pitsaasutut isigineqartoq.
Naalakkersuisut nittartagaanni takuneqarsinnaavoq, Air Greenlandip Kalaallillu Nunaanni Sulisitsisut saniatigut allanik siunnersuutip tusarniaaffigineqarneranut akissuteqartoqarsimanngitsoq.
Siunnersuummi anguniagaavoq, nalunaaquttap ingiaqatigiiffiata tiimimik ataatsimik allanngortinneqarneratigut, ullumikkut nalunaaqutaq qulinngortuuppat, siunissami nalunaaqutaq qulingiluanngortassaaq - sumiiffiit immikkut nalunaaqutaqartut matumani ilaatinneqanngillat.
Sumiiffiit pingasut immikkut nalunaaqutaqartut tassaapput, Ittoqqortoormiit nunarsuarmi nalunaaquttap ingerlaqatigiiffiani UTC -1-imiittoq, Danmarkshavn UTC +0-miittoq aammalu Pituffik (Thule Air Base) nunarsuarmi nalunaaquttap ingerlaqatigiiffiani UTC -4- miittoq.