Air Greenland kinguaattoornermik eqqorneqartoq
Teknikkikkut ajornartorsiutit silassarlu Air Greenlandimut akornusiipput. Avannaani, Tunumi Qeqertarsuullu Tunuani silassap unerisimannginnera pissutigalugu tallimanngornermi angallassinissat taamaatiinnarneqartut sisamanngornermi nalunaarutigineqarput.
Air Greenlandip aqussinnaanngisaa, eqqumaffigisariaqangaali, tassaavoq silassaq. Air Greenlandip Avannaani, Tunumi Qeqertarsuullu Tunuani angallassinissai maanna kinguaattoorfiupput.
Silaannakkut angallassinerup tallimanngornermi kinguaattoorfiunissaa Air Greenlandip Facebookimini sisamanngornermi nalunaarutigereerpaa.
- Sineriammi sumiiffinni arlariinneq aqagu silarlunnissaa ilimasaarutigineqarpoq: Upernavimmi, Tasiilami aamma Kulusummi anorlernissaa ilimasaarutigineqarpoq timmisartuussinissamullu pilersaarutit taamaatinneqarput. Qeqertarsuup tunuani apinissaa ersarlunnissaalu ilimasaarutaavoq. Taamaammat angalasussat timmisartuussinissanut paasissutissiinerit misissullattaassagaat qinnuigissavagut, Air Greenland Facebookimini allappoq.
Norsaq teknikkikkut akornuteqarsimasoq
Atlantiku qulaallugu angallassineq sisamanngornermi ullaakkut aamma ajornartorsiutaasimavoq. Norsarmi teknikkikkut akornuteqarmat angalanissaq akunnernik marlunnik kinguaattoorsimavoq. Kinguaattoornermi angalasussat arlallit apuuffissaminnut apuutinngitsoorsimapput.
- Ilaasussat tamangajammik tikiffissaminnut ullumi (sisamanngornermi, aaqq.) apuutissapput, Ilulissanullu angalasussat arfinilliinnaat kingusinnerusukkut timmisartuunneqartussaallutik, Air Greenland allappoq.
Sapaammi anorersuassangatinneqarpoq
Anorersuarnissaanik ilimasaarineq tallimanngornermuinnaq atuutinngilaq. Upernavik, Kulusuk Tasiilarlu anorersuassangatinneqarsimapput, Qeqertarsuullu Tunuani nittaalassangatinneqarsimalluni. DMI-lli Nuummi sapaammi ataasinngornermilu anorersuarnissaa ilimasaarutigilereerpaa.
DMI naapertorlugu sapaatiuppat ullaassakkut anorersuaq sakkortusiartussaaq, nal. 03.00 sakkortunerpaamiissalluni. Anorersuarnissaa nittaalarnissaalu sapaammi ataasinngornermilu ilimasaarutigineqarpoq.
Silap unerisimannginnissaa pillugu angallassineq kinguaattuussanersoq, Air Greenland suli nalunaaruteqanngilaq.