Air Greenland DK-mit bilitsinik tunisaqaqqittalersoq
Air Greenlandip ammaaqqinnermi immikkoortup siulliup aallartinneqarneranili Danmarkimit bilitsinik tuniniaaneq matoqqatissimavaa, maannali bilitsinik pisiaqaqqittoqarsinnaanngorpoq.
Naalakkersuisut juunip 15-iani ammaaqqinnermi immikkoortoq siulleq atuutsilerlugu nunamut tikittoqarsinnaanera ammaammassuk, Air Greenlandimi bilitsinik tunisassaqartoqarsimanngilaq. Inuit qassit nunamut isersinnaanerat killeqartinneqarsimavoq, bilitsillu 600-t sapaatip akunneranut pissarsiarineqarsinnaasut tamarmik pisiarineqareesimallutik.
Timmisartuutileqatigiiffiup taamaammat nalunaarutigisimavaa, juulip aggustillu qaammataanni bilitsinik tunisassaateqaratik, bilitsinilli tunisassaateqalerunik tuniniaaneq ammaqqinniarlugu.
Tamanna maanna pivoq. Tassa aasaanerani sulinngiffeqarluni nunanut allanut angerlamullu maanna bilitsisisoqarsinnaanngorpoq.
Sapaatip akunneranut 600-innaat
Air Greenlandimit Sermitsiaq.AG-mut erseqqissaassutigineqarpoq, sapaatip akunneranut nunamut isersinnaatitaasut pillugit Namminersorlutik Oqartussat maleruaqqusaat suli malinneqartut.
Namminersorlutik Oqartussat sapaatip akunnerata siuliani ammaaqqinnermi immikkoortoq siulleq juulip 20-ata tungaanut sivitsorallarpaat.
Air Greenlandip nittartagaani, sapaat kisiat eqqaassanngikkaanni, sapaatip akunnerata ulluini tamani bilitsimik inniminniisoqarsinnaanngorpoq.
Air Greenlandimit ilisimatitsissutigineqarpoq, angalanerit ilaat Islandikkoortassasut, allalli nalinginnaasutut Københavnimiit Kangerlussuarmut ingerlaartassasut.