timmisartup ajutoornera

Air Greenland: Dash 8 mittarfiup sinaanut sisoorpoq

Ilulissani timmisartup pingasunngornerni ullaakkut ajutoornerani inunnik annertuumik ajoqusertoqanngilaq

Ilulissanit mittarfiup tungaanut aqqusineq politiit suli assersorpaat

Timmisartumi Ilulissat mittarfiani pingasunngornermi ullaakkut ajutoortumik ilaasut aqqaneq marluupput timmisartullu inuttai pingasuullutik. Inuit sisamat napparsimmaviliaanneqarput qujanartumillu annertuumik ajoqusertoqanngilaq.

- Aatsaarluinnaq nalunaarfigineqarpugut Air Greenlandip Dash 8-mik timmisartuussiinerani gl 3205-mi Kangerlussuarmiit Ilulissanut pisup minnerani timmisartoq mittarfiup sinaanut sisoorsimasoq. Maannamuugallartoq nalunaarutaasut malillugit ilaasunit aqqaneq marluusut inuttallu pingasuusut akornanni annertuumik ajoqusertoqanngitsoq, Air Greenland nalunaarpoq.

Timmisartup ajutoornera pivoq pingasunngornermi ullaakkut nalunaaqutaq 08.43 Upernavimmiillu suluusalinnik Ilulissanut timmisartuussinissat pingasunngornermi taamaatiinnarneqarput.

Mittarfiup aqqutaa politiit suli asseqqavaat. Air Greenland pingasunngornermi kingusinnerusukkut tusagassiortunik katersortitsiniarpoq.

- Air Greenlandip upalungaarsimanermut pilersaarutaa atuutilereerpoq paasissutissanillu nutaanik takkuttoqarniariarpat suliffeqarfik tusagassiorfinnut nalunaarumaarpoq, Air Greenland nalunaarpoq.

Powered by Labrador CMS