Air Greenland bilitsinik utertitsisarneq pillugu malittarisassanik misissuisoq
Namminersorlutik Oqartussat juunip allaqqaataanit imarpik ikaarlugu timmisartuussisarnerit amerlineqarnissaannik, Air Greenlandimik isumaqatigiissuteqarsimapput. Timmisartuutileqatigiiffiullu bilitsit akikinnerit utertinneqarsinnaanersut misissorniarpaa.
Nal. 09.05 isumaqatigiissutip atuuffissaa iluarsineqarpoq.
1. juni 2020-miit Kastrupip Mittarfiata aamma Kangerlussuup akornanni sapaatip akunneranut pingasoriarluni Imarpik qulaallugu timmisartuussisoqartalernissaa pillugu Naalakkersuisut Air Greenlandimut isumaqatigiissuteqarput.
Isumaqatigiissuteqarnermut atatillugu Namminersorlutik Oqartussat periarfissaq iluatsillugu, innuttaasut amerlasuut maannarpiaq bilitsinut akikinnernut pisiarineqareersunut atatillugu nalornissuteqarnerat kipiluttunartorsiornerallu pillugu Air Greenland oqaloqatigaat, tusagassiorfinnut nalunaaruteqarnermi ilisimatitsissutigineqarpoq.
Ineqarnermut Attaveqaqatigiinnermullu Naalakkersuisoq Karl Frederik Danielsen oqarpoq:
- Bilitsinut assigiinngitsunut piumasaqaatit niuernermik tunngasunik, taamaallaat Air Greenlandimit susassaqarfigineqartunik tunngaveqarput. Air Greenlandip inatsisit malittarisassallu, suliassaqarfimmut atuuttut malitarai .
Utertitsisarnissaq pillugu inatsisiliornianngitsoq
Karl Frederik Danielsenip siusinnerusukkut oqaatiginikuuaa, Naalakkersuisut coronap atugaanera pissutigalugu timmisartuussinissamik taamaatitsiinnartoqarneranut atatillugu bilitsimik utertitsinissamut Air Greenlandimut peqqussutitalimmik inatsisiliornianngitsut.
Maannali Namminersorlutik Oqartussat timmisartuutileqatigiiffillu oqaloqatigiipput, Namminersorlutik Oqartussanit oqaatigineqarpoq.
- Kisiannili soorunami apeqqut taanna oqaluuseraarput, Imarpik qulaallugu timmisartuussinernut bilitsinik akikinnernik utertitsisinnaaneq, maannarpiaq COVID-19-ip atuunnerani pissutsit allaalluinnartut atuunneri peqqutigalugit innuttaasunit amerlasuunit soqutigineqarmat , Karl Frederik Danielsen oqarpoq.
- Innuttaasut amerlasuut nunarsuarmi pissutsit pillugit nalornissuteqarmata, tamanna uanga Air Greenlandillu paasilluarparput .
Naalakkersuisup ilisimatitsissutigaa, Air Greenland maanna innuttaasunik, Imarpik qulaallugu bilitsinik akikinnernik pisisimasunik, angalanissamut periarfissaqanngitsunik imaluunniit maannarpiaq angalanissaminnik kissaateqanngitsunik naaperiaanissamut periarfissanik misissuilersoq.
Aningaasatigut ikiorsiineq
Air Greenland ilisimatitsivoq, Imarpik qulaallugu bilitsinik akikinnernik maajip ulluisa 22-anni nal. 8.00-imiit allannguisoqarsinnaalissammat – Atortut peqqutaallutik allannguinissaq siusinnerusukkut pisinnaanngilaq .
- Isumaqatigiissut, Air Greenlandimut isumaqatigiissutigisarput aamma aningaasatigut kingunerisassanik, Air Greenlandip bilitsit ilaannut piumasaqaatinik allannguinermini eqqorneqaatissaanik annikillititsisussaavoq .
Sapaatip akunneranut pingasoriarluni Imarpik qulaallugu timmisartuussisarnissamut isumaqatigiissut 1. juni 2020 atuutilissaaq, maannamuugallartorlu 2020-mi aggustusip qaammataata naanissaanut atuutissalluni. Tamatuma kingorna isumaqatigiissut sivitsorneqarsinnaavoq.