Air Greenland bilitsinik tuniniaanermik unitsitsigallartoq
Ingerlatseqatigiiffik aamma Dash8-ini saqisoqarani timmisartuussinissamut immikkut ittumik akuerineqarsimavoq.
Nunatsinni angalanissamut aamma Air Greenlandip nittartagaatigut bilitsisoqarsinnaajunnaarpoq. Tamatumunnga pissutaavoq, sulisut ilaasullu akornanni coronamik tunillatsittoqarsimanerata angerlarsimaannartoqarneratalu malitsigisaannik timmisartuussiniarnerup ajornarnerulersimanera.
Air Greenlandimit ilisimatitsissutigineqarpoq, massakkorpiaq pisut peqqutaallutik sapaatip-akunnerata tulliani nunatsinni timmisartuussinissani inissat ikittuinnanngorsimasut.
- Oqatussallu innersuussutaat malikkatsigit, maannakkumiit januarip 16-ata tungaanut www.airgreenland.gl –ikkut bilitsisisoqarsinnaanngilaq, Air Greenland tusagassiorfinnut nalunaaruteqarluni allappoq.
Air Greenlandimit Sermitsiaq.AG-mut nassuiaatigineqarpoq, ilaasut akornanni coronamik tunillatsittoqartarnera angerlarsimaannartoqartarneralu maannakkorpiaq suliusunik amerlanerusunik pisariaqartitsisoq, inuppassuimmi timmisartumut allamut nuunneqartarnissaminnik piumasaqartarmata.
Saqisoqarani timmisartortoqartariqartoq
Timmisartuussivissanili assigiinngitsuni inissat ikittunnguit ammatinneqarput, inuuttaasunut pisariaqavissumik angalasussanut atorneqartussat, soorlu napparsimaleriataarneq, qanigisamik toqusoqarnera assigisaaluunnit peqqutigalugit angalasariaqalersunut.
Ingerlatseqatigiiffik aamma Angallannermut Aqutsisoqarfimmit timmisartuni DASH8-ni saqisoqarnani
timmisartuussinissamut immikkut ittumik akuerineqarsimavoq. Tassanili piumasaqaataalluni timmisartumi ilaasut amerlanerpaamik 19-iusassasut.
Kalaallit Nunaanni silaannakkut angallassineq qulakkeerniarlugu akuersissummik tunniussisoqartoq, oqaatigineqarpoq.
Piffissaq kingulleq atorlugu allannguisoqarsinnaasoq
- Timmisartuussinernilu taakkunani timmisartumi pilotit isumannaallisaanermut tunngasut ilisimatitsissutigalugillu ilaasunut attaveqartuussapput. Ilaasussallu timmisartup 19-niinnarnik ilaasoqarsinnaaneranik eqqugaasut piaarnerpaamik timmisartuussinissamut allamut nuunneqartassapput, Air Greenland allappoq.
Ingerlatseqatigiiffimmit aamma oqaluttuarineqarpoq, sulisut akornanni tunillatsissimasoqarnera angerlarsimaannartoqarneralu pissutigalugit, piffissaq kingulleq atorlugu timmisartorfissat allanngortinneqartarsinnaasut:
- Silaannakkut angallassinissanut pilersaarutit malillugit sapinngisarput tamaat ingerlatsiniartuarpugut, ilaasussallu tunillatsinnerup nassataanik aallarsinnaajunnaartut angalanissaat allanngortittarlugit, Covid-19-ili piffissami matumani nunatsinni Danmarkimilu annertuumik atuummat, ilaatigut piffissaq kingulleq atorlugu allanngortitsisariaqartarsinnaavugut, Air Greenlandip atuisunut sullissinermik pisortaa Johanne L. Knudsen oqarpoq.