Air Greenland arlalinnik ajornartorsiuteqartoq
Air Greenlandimut sila teknikikkilu ajornartorsiutaaginnartanngillat, maannalu ilaasussat tikiffissaannut anngunniarnerat aamma ajornartorsiutaalersimavoq. Tassani Nuummi mittarfiup qullii ajortissimapput, Mittarfeqarfiillu ajornartorsiut aaqqiiffiginiarlugu tamaviaarlutik sulisut oqaatigineqarluni.
Sapaatip-akunnerani kingullermi mittarfiit aputeqarlutillu quasannerat timmisartuussinissanut kinguaattoorfiusimapput, tamatumalu kingorna dash-8 teknikkikkut ajornartorsiuteqarsimalluni aamma timmisartorsuarmi Norsami perusuersartarfik serlersaariffigineqarsimavoq, tamatumalu malitsigisaanik politiit timmisartorsuarmut Københavnimiit ilaasut sisamanngornermi uninngatittariaqarsimavaat.
Eqqornerlunneqarnerpaanut ilaasut tassaapput Upernavimmiit, Qaanaamiit tunumiillu ilaaniartut. Ilaasussat ilaasa ilisimatitsissutigaat, Qaanaami arlaqarlutik oktobarip 15-ianili aallartussaasimagaluarlutik, timmisartuussinissarli pingasoriarluni taamaatiinnarneqarsimavoq. Ilaasussap oqaatigisimavaa, aallarfissanit pingasoriarluni taamaatiinnarneqartunit ulloq ataasiinnaq silarlussimasoq.
Ullaakkut unnukkullu taamaatitsiinnartariaqarsimaneq
Air Greenlandimit Facebookikkut allapput, maanna anorikilliartormat sapaatip-akunnerani kingullermi anorersuarneranit allatigut ajornartorsiuteqarnermit pissuteqartumik taamaatitsisarnerit angummaffiginiarlugit timmiartuussinerit manna ingerlanneqartut.
- Kisianni unammilligassamit allamit eqqugaavugut, tamannalu unnuk manna Nuummut Nuummiillu timmisartuussinissat taamaatittariaqalernerinik nassataqassaaq. Mittarfimmimi miffiusartup 04-p qullii ajortissimammata, silap taarsereernerani, soorlu unnugu nal. 18.29-p kingorna, timmisartut missinnaanngillat, Air Greenlandimi sapaammi ualikkut allapput.
- Qulliillu amigaataaneri aqagu ataasinngornermi ullaakkut nal. 07.54-p tungaanut timmisartuussinissat kinguaattoornerinik kinguneqassaaq, taammatullu aqagu unnukkut nal. 18.26-p kingorna taarsippat. Soorunami neriuppugut mittarfiup qullii aaqqinneqapallassasut, tamannali uagut sunniuteqarfigisinnaanngilarput. Kinguaattoornerit taamaatitsisariaqarnerillu ajuusaarutigaavut.
Mittarfeqarfiit Sermitsiaq.AG-mut ilisimatitsissutigaat, ajornartorsiut aaqqiiffiginiarluni pisoq erseqqinnerusumik misissorneqartoq.