takornarialerineq
Air Greenland aqqummik nutaamik ammaavoq
Ilulissanit Islandimut Air Greenland aasarumit angallassisalissaaq. Danmarkimut timmisartuussisarneq aamma allannguuteqarpoq
Air Greenland 2016-mut allannguutinik saqqummiivoq. Tassami Ilulissanit Islandimut timmisartuussisoqartalissaaq. Aamma Danmarkimit Nunatsinnut unnuakkut amerlanerusunik timmisartuussisoqartalissaaq, kiisalu Københavnimit Narsarsuarmut maannamut amerlanerusunik timmisartuussisoqartalissalluni.
Timmisartuutileqatigiiffik amerlanerusunik ilaasoqartalersimanera pissutigalugu allannguuteqartitsisoqartoq Air Greenlandimit Christian Keldsen standby.dk-mut ilisimatitsivoq.
Takornariat
- Nunanit allaneersunit takornariat amerlanerusut timmisartuuppavut. Juunimi juulimilu aatsaat taama ilaasoqartigaagut, aamma aggustimi amerlanerusunik ilaasoqarsimanissarput naatsorsuutigaarput. Tysklandimit, Tuluit Nunaannit Amerikap avannaaneersuniillu ilaasoqarnerulernikuuvugut, oqarpoq.
Ilulissanit aqqut nutaaq
Keflavikimit Ilulissanut juunimit aggustip tungaanut timmisartuussisoqartalernissaa aamma nalunaarutigineqarpoq. Sapaatip akunneranut 16-riarluni tassuuna timmisartuussisoqartalissaaq.
Aamma Københavnimut angalasoqartalissaaq unnuakkut, taamaasilluni Danmarkimut ullaakkut tikittoqartalissalluni. Taamaasilluni nunanut allanut angalanissat angumerineqartalissallutik, Christian Keldsen ilisimatitsivoq.
Københavnimut timmisartuussinerit marlunngornermi sisamanngornermilu aamma allannguuteqarput, tassami nalunaaqutaq 11.00 aallartoqartalissammat.