Air Greenland aningaasatigut ajornartorsiortoq

Martsip qaammataani nunap matuneqarnera aamma nunami namminermi aamma Danmarkimut Islandimullu killilipilussuarmik timmisartunik angallassisimanerit pissutaallutik, Air Greenlandip ukiup affaani siullermi naatsorsuutaasa inernerisa akileraannginnermi -30,5 millioner koruunit angusimavai, tassalu 2019-imi piffissap taamaalernerani 27,3 mio. koruuninik ikinnerullutik.

Suliffeqarfiup kaaviiaartitai ilanngaaseriikkat 11,4 %-imik appariarlutik 551,8 millioner koruuniupput, siorna qaammatini siullerni arfinilinni 622,9 millioner koruuniusimasut. Nalunaarusiaq tamaat atuaruk UANI

- Mette Frederiksenip Danmarki matummagu, kinguninguatigullu Naalakkersuisut Kalaallit Nunaat martsip 20-ani matumassuk sullitatinnnut tunngaviusut ullormiit ullormut tammavipput, Air Greenlandimi pisortaaneq Jacob Nitter Sørensen Sermitsiaq.AG-mut oqaluttuarpoq.

Siunissaq isumalluarnartoq

- Apriilip qaammataa tamakkerlugu maajillu qaammataata annersaa ilaasoqarpallaarsimanngilagut, taanna nangilluni oqarpoq.

Juulip 21-ani nunamut tikittoqaqqissinnaanngorpoq, taamaalilluni niuerfiup ilaa atuuteqqilerpoq, suliffeqarfiulli ukioq mannamut naatsorsuutigisimasaa suli nalleqqajarneqanngilaq.

- Sipaaruteqarniarneq pikkoriffigisimavarput. Timmisartuussivallaanngilagut, ilaasunulli assartuinermullu atatillugu atorsinnaasavut atorluarsimavagut, pisortaq erseqqissaavoq.

Suliffeqarfik aningaasanik ikinnerusunik atuisimasoq

Air Greenlandip avataani allanut aningaasartuutigisartakkani 50,9 millioner koruuninik ikilisillugit 278,5 millioner koruuninngortissimavai.

Ilaatigut suliakinneruneq pissutigalugu aningaasartuutaasartut taamatut annertutigisunngorlugit ikilisinneqarsimapput. Pisortallu sulisut suliaqarsimanerat naammgisimaarluarpaa.

- Sulisuvut kakkageqaakka. Pissutsit taamaanerisa allatut eqqarsartilersimavaatigut, periarfissanillu sapinngisatsinnik atuisimalluta, sulisuvullu sulilluarsimaqaat, taanna oqarpoq.

Soraarsitsisimanerit aningaasanik sipaarutaasimasut

Sulisoqarnikkullu aamma aningaasanik sipaaruteqartoqarsimavoq.

Sulisunut aningaasartuutigisartakkat 3,8 millioner koruunik ikilisillugit 223 milliorner koruuninngortinneqarsimapput. Tamatumunnga ilaatigut pissutaavoq, Air Greenlandip maajip qaammataata naanerani coronap ajornartorsiortitsinerata toqqaannartumik kinguneranik sulisunik 60-inik soraarsitsisimanera.

Tamatumunna peqatigitillugu suliffeqarfiup nalunaarutigisimavaa, aappaagu missingersuutissat eqqarsaatigalugit 225 millioner koruuninik sipaaruteqartoqassasoq. Pilersaarut tamanna iluatsinniarpasittutut isikkoqarpoq, Jacob Nitter Sørensen oqarpoq.

Ukiumut angusassat ataatsimut eqqarsaatigalugit isumalluarpoq. Coronami atuukkaluartoq, suliffeqarfimmit naatsorsuutigineqarpoq, annikikkaluamik pitsaasumilli 2020-mi angusaqartoqarumaartoq.

-Qujanartumik niuerfeqarpugut coronamit eqqugaasimanngitsumik. Annaassiniartarnisamik ujaasisarnissamillu isumaqatigiissuteqarpugut, Kiffartuussisarnissamik isumaqatigiissuteqarpugut aamma US Airforcemut isumaqatigiissuteqarpugut coronamit sunnerneqarsimanngitsumik. Tassa timmisartuutileqatigiiffinnut timmisartuussisuinnaq atorneqartartunut sanilliulluta niuertutut ulorianartorsiorpallaanngilagut. Niuerfippullu coronamit eqqugaasimasoq iluarsaassinnaagutsigu, ukioq sinneqartoorluta naasinnaallutigu upperaarput, pisortaq oqarpoq.