Skip to main content

Air Greenland angusaminik naammagisimaarinnippoq

Naak timmisartuutileqatigiit kaaviaartitaat 10 millioner koruuninik ikileriarsimagaluartut, suliffeqarfik 2014-imi 80,7 millioner koruuninik sinneqartooruteqarpoq

Air Greenlandip 2014-imi akileraannginnermini 80,7 millioner koruuninik sinneqartoorpoq. Akileraareernerani 52,7 millioner koruuniullutik. 

Ukioq manna angusat siulersuisunit naammagisimaarneqarput.

Angallavinni angallannermi niuerfik naatsorsuutigineqartutut siuariarfiunngitsut Air Greenlandimit nalunaarutigineqarpoq, taamaattumillu siorna Air Greenlandip aningaasartuutinik ikillisaanissaq aammalu takornariaqarnermi ineriartortitsinissaq aalluppaa. 

- 2014-imi angusat ingerlatseqatigiiffiup timmisartuata Airbus A330-200-p, nalinginnaasumik Imarpik qulaallugu timmisartuussisartup attartortittarnerani suliat amerlinerinit sunniuteqarfigineqarput, timmisartuutileqatigiiffik taama nalunaaruteqarpoq.

2014 ukiuuvoq, Air Greenlandip timmisartuutiminik suluusalinnik naleqqussaanissamik allanngortitassaanngitsumik aalajangiussiffigisaa, taamaattumillu Dash 8-t marlunnik ilallugit pisisoqarpoq. Taamaalilluni Dash 7-ip, ukiut 35-t sinnerlugit ingerlatseqatigiiffimmut sullissisuusimasoq tunineqarsinnaalerpoq.

Kaaviaartitat 10 millioner koruuninik ikilipput
Timmisartuutileqatigiiffiup 2014-imi kaaviiaartitai 10 millioner koruuninik ikilipput, kiisalu ingerlatsinermi nalinginnaasumi angusat 2013-imut naleqqiullutik taamaaginnarput. 

- Air Greenland niuerfimmi ajornakusoortumi naammaginartunik angusaqarpoq. Tamanna ilaatigut qullersat sulisullu Kalaallit Nunaanni nunanilu allani sullitanut iluaqutaasumik aningaasartuutikillisaanissamik aallussiuarnerisigut anguneqarpoq, siulersuisunut siulittaasoq Jens Wittrup-Willumsen oqarpoq.

Atuaruk: Hotel Arctic ukiumi naatsorsuusiorfiusumi rekordileeqqippoq

Taanna ima nangippoq:

- Kalaallit Nunaanni takornariaqarnerup ineriartornera Air Greenlandimut pingaaruteqartorujussuuvoq. Taamaattumik ilaatigut suliffissuit ingerlatseqatigiiffiusut akornanni niuerfimmi annertunerusumik najuunnissaq, aammalu tunisassiat ataatsimoortut unammillersinnaasut amerlanerusut ineriartortinneqarnissaat pillugu suleqatigiinnerup annertusineqarnera aqqutigalugu takornariartartut amerlinissaat siunnerfeqartumik sulissutigaarput. Suliffissuup piginneqatigiiffiutai tamarmik 2014-imi siuariarfiupput, aammalu ukiuni tulliuttuni takornariartitsinermik aallutaqarnertik ingerlatiinnassavaat. Tamanna ineriartorfiuvoq pingaarutilik - uagutsinnuinnanngitsoq – aammali inuiaqatigiinnut tamarmiusunut

Air Greenlandip 2014-imi niuerfimmi piumasaqaatit nutaat unammillerneqarnerullu annertusinissaanik naatsorsuuteqarneq tunngavigalugit suliniutiminik ineriartortitsinissani sulissutigisimavaa. 

- Tamatuma kingunerisaanik siunissami unammillersinnaaneq qulakkeerniarlugu anguniagaqarfiusumik sulineq ingerlateqqinneqassaaq, timmisartuutileqatigiit taama nalunaaruteqarput. 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER