Skip to main content

Air Greenland aatsaat taama aningaasaliissuteqartigaaq

Inuit 1259-it Kangerlussuup Nuullu akornanni 2016-mi Arctic Winter Gameseqalerpat assartornissaat Air Greenlandimut unammilligassaavoq annertooq

Air Greenland aamma Arctic Winter Games 2016 Air Greenlandip oqaluttuarisaanerani aningaasaliinerit annersaat pillugu atsioqatigiipput. Aningaasaliinermi pineqarput Arctic Winter Gamesimi peqataasussat Kangerlussuup Nuullu akornanni assartornissaat.

Arctic Winter Games 2016 Nunatsinni pisartut annersarisussaavaat. Arctic Winter Games 2002 maannamut pisut annersaat taamanikkut aaqqissuisuuneq Nuup aamma Nunavummi Iqaluit avimmassuk. Maanna aaqqissuussineq tamarmi Nuummiittussanngorput ishockeymik unamminerit Iqalunni pisussat eqqaassanngikkaanni.

Silaannakkut assartuinersuaq
Canadami Alaskamilu illoqarfiit aaqqissuisuusartut nammineq timmisartunut angisuunut mittarfeqartarput. Nuummili timmisartorsuarnut mittarfissaq suli sananeqanngilaq. Taamaammat peqataasussat Kangerlussuarmukaanneqassapput tassanngaanniillu Nuummut timmisartuuteqqineqassallutik. Air Greenlandip suliassarilerpaa Kangerlussuup Nuullu akornanni assartuinissaq.

- Arctic Winter Games pisartuuvoq asseqanngitsoq. Kalaallit Nunaannut uatsinnullu. Canadami sanilitsinnik timmisartuutitsinnut tikilluaqqusinissarput qilanaarisorujussuuarput. Amerlanersaannummi Air Greenlandimik naapitsineq Kalaallit Nunaannik naapitsinermi siullersaasarpoq, akisussaaffillu tamanna pimoorupparput – aammattaaq Arctic Winter Games 2016 eqqarsaatigalugu, Air Greenlandimi pisortaaneq Michael Højgaard oqarpoq.

Pisut annersaat
Timersuutini assigiinngitsuni 15-ni peqataasut katillutik 1259-ussapput aammalu kulturimik takutitsinermi peqaasussat aamma tikittussaallutik. Taakku saniatigut nunat peqataasut politikkikkut qullersaat atorfilittaallu peqataassapput. Inuppassuit tikippata assartornissaanni Air Greenlandip dashimik timmisartuutini tamangaasa atussavai aammalu angerlakaalerpata assartoqqissallugit.

- Arctic Winter Games 2016-ip piviusunngortinnissaanut Air Greenland suleqataaniarmat, aammalu inuusuttortatsinnut timersornermik kulturimillu suliaqartunut tapersersuimmat nuannaarutigisorujussuuarput. Kalaallit Nunaata oqaluttuarisaanerani aaqqissuussaanerit assingusut annersarissavaat, aammalu inuit peqataasussat 2000-it tamarmik Kalaallit Nunaannut uterlugulu assartornissaannut Air Greenland misilittagaqarluartoq ilisimasaqarluartorlu nalunngilarput, Arctic Winter Games 2016-mi pisortaq Maliina Abelsen oqarpoq..

Arctic Winter Games 2016-mi martsip arfernaniit aqqarnanut ingerlanneqassaaq neriuutigineqaannarsinnaavorlu ulluni timmisartuussiffissani sila timmisartorfissaajumaartoq.

Arctic Winter Games pillugu allaaserisat uani atuarsinnaavatit

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER