Aingaasaqarnermut Siunnersuisoqatigiit Vittusilu mianersornissamut tunngavik pillugu isumaqatigiinngitsut

Aalisarnermit isertitat millioninik pingasunik kisitsisitalinnik Nunatta Karsianut isertitsissutaapput. Tamanna aalisarnermi akigititat sammineqarluarnerannit pissuteqarpoq, kinguppannummi qaleralinnullu akitsuutit ukiuni kingullerni aatsaat taamak annertutigisimapput.

Aningaasaqarnermut Siunnersuisoqatigiit naatsorsorsimavaat, aalisakkanut kinguppannullu akigititat 20 procentimik appariarsimanerat, ilaatigut isumalluutinut akitsuutit aqqutigalugit isertitassatut annaaasaqaataassasut.

Akigititat appariarnerat millionilikkaanik naleqarput

- Aalisakkat akiisa 20 procentimik appariarnerisa malitsigisaannik pisortat isertitassaat toqqaannartumik 232 millioner koruuninik ikileriassapput. Isumalluutinut akitsuutit 113 millioner koruunit nalingannik appariassapput (maannakkorpiaq iluanaarutinut sanilliullugu 27 procentit missaannik), Akileraarutit A-t 92 millioner koruuninik ingerlatseqatigiiffiillu akileraarutaat 27 millioner koruuninik ikinnerulissallutik, Aningaasaqarnermut Siunnersuisoqatigiit naqissusiipput. Akigititat 10 procentimik appariarnerisigut isertitassatut annaasat 101 millioner koruuniussapput.

- Akigititat 20 procentimik appariarnerat soorunami malunnaateqassapput, tamannali ingasattutut isigineqarsinnaanngilaq, taama isumaqarpoq Aningaasaqarnermut Siunnersuisoqatigiinni siulittaasoq, Aarhus Universitetimi professori Torben M. Andersen, taassuma innersuussutigai akigititat ineriartorsimanerat, tassa assersuutigalugu kinguppaat nalingat ukiut arfineq-pingasuinnaat ingerlaneranni marloriaatinngorsimaapput qaleraliillu nalinga 50 aamma 60 procentit akornanni qaffassimalluni.

Mianersoqqussut

Henrik Lethip, Polar Seafoodimi siulersuisuni siullittaasup, qanittukkut mianersoqqussutigaa, kinguppannut akigititat ukioq manna apriilip qaammataanili 10 procentimik appariarsimanerat.

Sermitsiaq.AG-mit taamaammat Aningaasaqarnermut Naalakkersuisoqarfik aperineqasimavoq, 2020-mut aningaasanut inatsisissatut missingiut siulleq suliarineqarmat akigititat appariarsimanerat eqqarsaatigineqarsimanersoq. Naalakkersuisoqarfimmit oqaatigineqarpoq, ”2020-mi kinguppannut akigititassat missingersuusiorneqarnerat mianersortumik suliarineqarsimasoq, aamma Nunatta Karsiata isertitassaasa piviusorsiortuunissaat naatsorsuutigineqartoq”.

Isumaqatigiinnginneq

Aningaasaqarnermut Siunnersuisoqatigiit isumaqarput, aningaasanut inatsit aqqutigalugu allatut missingersuusiortoqartariaqartoq, oqaatigaallu pisariaqartoq, aalisakkanut akigititat allanngorarnerujussuannut attuumatinneqannginnerusumik

inuiaqatigiit aningaasaqartinneqarnissaat.

- Pingaaruteqarpoq, inuiaqatigiit aalisakkanut akigititat qaffasittuartinneqarnissaannik pisariaqartitsinnginnissaat. Taamaammat aalisakkat qaffasissumik akeqartillugit missingersuutitigut sinneqartoorujussuartoqarnissaa siunertamut naapertuutissangaluarpoq. Taamaalilluni piffissat ilaanni aalisarnermi aalisakkat pingaarutillit akiisa appaqqinneranni pisortat sipaarniassanngikkaluarput , taamak Aningaasaqanermut Siunnersuisoqatigiit isumaqarput.

Siunnersuisoqatigiit innersuussutigaat, periutsit assigiinngitsut atorlugit missingersuusiortoqarsinnaasoq, soorlu aningaasaateqarfiit aaqqissugaanerat aqqutigalugu, imaluunniit akigititat qaffasinneranni pisortat aningaasaqarnikkut sinneqartooruteqarnissaannut piumasaqaatip annertusineqarneratigut.

Annikitsunnguanik sinneqartooruteqarneq

- 2020-mut aningaasanut inatsisissatut siunnersuut taamatut mianersonissamut naapertuutinngilaq. Missingersuusiornermi isumalluutinut akitsuutinit 399 millioner koruunit isertinneqassasut naatsorsuutigineqarsimavoq, imaluunniit 2018-imi isumalluutinut akitsuutinit 425 millioner koruunik iluanaaruteqarujussuarsimanermit ikinnerulaartunik isertitsisoqarnissaa naatsorsuutigineqarsimavoq. Peqatigitillugu Ingerlatsinermi Sanaartornermilu 6 millioner koruuninik sinneqartuulaartoqarnissaanik missingersuusiortoqarsimasoq, Aningaasaqarnermut Siunnersuisoqatigiit allapput.