Agnethe nersorneqarpoq: Uimi inuunera annaakkaa

Kalaallit Røde Korsimit Ukioq 2021-mi Ikiueqqaarnermi nersornaammik tigusisussatut Niaqornaarsummit Agnethe J. Søholm toqqarneqarpoq.

Angallammik angalaarnerminni Agnethe J. Søholmip uiata Aqqalu Søholmip uummataa unimmat annaappaa.

Inuunermik annaassisoq

- 2021-imi ikiueqaarnermi nersorneqartussatut toqqarneqartoq julip arfineq pingajuanni 2021-imi, uini ernutartillu sisamanik ukioqartoq ilagalugit umiatsiaaqqaminnik Niaqornaarsuup iluani Qarlutuumi Puersumi angalaarsimapput. Puersu Niaqornaarsumiit 70 km missaannik ungasitsigisumiippoq. Pineqartut asimiinnerini uisoq, Aqqalu Søholm tassanngaannaq ummamminik unittoorluni uppippoq. 2021- imilu ikiueqqaarnermik nersornaasigassasoq nangaarianngivilluni ikiueqqaarnermik ingerlatsilerpoq, tamassumalu kinguneranik uummarsaaneq iluatsippoq, Kalaallit Røde Korsiat tusagassiutinut nalunaarummi allappoq.

Iluatsittumik uummarsaareernerup kingorna Agnethe J. Søholmip ernguttani sisaminik ukiulik uinilu Niaqornaarsummut 70 km-imik isorartutigisumik umiatsiaaqqamik ingerlappai. Niaqornaarsummut apuutereernerup kingorna Aqqalu Søholm Aasiaat napparsimaviannut erngertumik ingerlanneqarpoq taassumalu kingorna Rigshospitalimut oqquneqarluni. Kingorna Nuummi Dronning Ingridip Napparsimaviani suliaritippoq pacemakerilerneqaatigisaminik (uummatikkut batteriitortumik atortulerneqarluni).

Sukkasuumik ikiuineq

Ikiueqqaarnermi ataatsimiititaliap siulittaasuata Julie S. Bendtsen-ip tunngavilersuummini makkua aallaavigai:

- 2021-imi ikiueqqaarnermik nersornaaserneqartussatut innersuunneqarsimasoq kr. 10.000-inik aningaasartalimmik nersornaaserneqarnissaa aaliangiussimavarput. Tamassumunnga tunngaviulluinnarpoq 2021-imi nersornaasigaassatut innersuunneqartoq ilisimaarinnilluarluni, sukkasuumik sukumiilluinnartumik ikiueqqaarnermut ilisimasani atorsimammagit, taamaasillunilu inuup inuuneranik annaassilluni. Innersuussinermik paasissutissat ataatsimiititaliamut saqqummiunneqarsimasut tunngavigalugit qularutissaanngilluinnarpoq, sukkasuumik ikiueqqaartoqarallartillugu Aqqalu Søholmip inuunera annaanneqarsinnaasimasoq.

Nersornaat tunniunneqareerpoq

Agnethe J. Søholmip qujassuteqarnermini ukua taarusussimavai:

- Qujassuteqarfingerusuppakka Kalaallit Røde korsiat. Ikiueqqaarnissamut qaquguluunniit nalaataqarfissanni sakkussannik tunisimammannga. Taamatullu aamma perorsaasikka angajoqqaakka qutsavissaqarfingingaarpakka. Meeraaninni angallattuartarsimammannga pinngortitami qanorluunniit nalaataqarfinni akisussaaffimmik tingusisinnaanngortillunga.

Nersornaat Agnethe J. Søholm-mut tunniunneqareerpoq. Nunatta isorartussusersua aammalu Covid 19-imik peqquteqartumik oqarasuaatit aammalu internet atorlugit tunniussineq ingerlanneqarpoq. Nersorinninnermut allagartaq nassiunneqassaaq, aningaasartaalu tunniunneqarlutik.