Agathep siulittaasup tulliatut qinigassanngorteqqissanerluni eqqarsaatigaa

IA sinnerlugu folketingimi ilaasortap Aaja Chemnitz Larsenip nalunaarutiginikuuaa, Inuit Ataqatigiit sapaatip akunnerata matuma naanerani nuna tamakkerlugu ataatsimeersuarneranni ingerlatsinermi siulittaasup tulliatut qinigassanngortinniarluni.

Agathe Fontain maannakkorpiaq siulittaasumut tullersortaavoq, taanna 2018-imi Sofia Geislerilu siulittaasumut tullinngorniukkamik qinigaasimavoq.

Fontain pingasunngormat Sermitsiaq.AG-mut SMS-erluni allappoq, qinigassanngorteqqissanerluni suli aalajangiussimanagu.

Aaja Chemnitz Larsenip qinigassanngortinnerminut tunngavilersuutigaa, partiimi pikkorinnerusoqalernissaa pisariaqartinneqartoq aamma partiip susassaqarfinnut arlalinnut tunngatillugit politikkia erseqqinnerusariaqartoq.

Sapaatiuppat qinersisoqassasoq

Agathe Fontain folketingimi ilaasortaq qinigassanngortittoq pillugu imatut allappoq:

- Aaja pikkorissuuvoq, sulerusuttullu tamaasa pisariaqartippavut.

IA-p nuna tamakkerlugu ataatsimeersuarnera arfininngorpat Nuummi Hotel Hans Egedemi pisortatigoortumik aallartissaaq. Tallimanngornermili ataatsimeeqataasussat Nuup Timersortarfissuani arlalitsigut isumasioqatigiissinneqarnerat allartinneqarsimalluni. Isumasioqatigiinnermi meeqqat inuusuttullu, aalisarneq kiisalu timmisartoqarfiliornerit sammineqarput.

Sapaatiup siulersuisussanik qinersisoqarluni partiimilu ingelatsinermi siulittaasup tullissaanik qinersisoqarluni ataatsimiinneq naggaserneqassaaq.