alkoholloven

Agathe Fontainip Sermitsiaq.AG sakkortuumik isornartorsioraa

Peqqissutsimut naalakkersuisup imigassat aalakoornartullit assiaqusersornerat iluaqutaassasoq suli aalajangiusimavaa. Taamaattorli toqqaannartumik ilimagisaanut uppernarsaatissaqanngilaq.

Demo mod alkohollov

Peqqissutsimut naalakkersuisup, Agathe Fontainip (IA) Sermitsiaq.AG-mi allaaserisaq avoqqaarpaa, tassani imigassat immikkut assiaqutsersorlugit nioqqutigineqarnerat atornerluinermut atuinnginnerulertitsinermut uppernarsaammik amigaateqarneq allaaseraarput.

Allaaserisaq Nunarsuaq tamakkerlugu Peqqinnissamik Sulianiaqatigiiffiup WHO-mi peqqussutit aamma misissuinerit aallaavigalugit allaaserisaavoq, taannalu Agathe Fontain (IA) naapertorlugu assersuinissamut aalajangersaanermut tunngaviusut ilagaat.

Ersarissusaat
WHO-p imigassat aalakoornartullit ersarinnginnerunissaat innersuussutigigaat, Agathe Fontainip erseqqissaatigaa.

- Nunarsuaq tamakkerlugu Peqqinnissamik Sulianiaqatigiiffiup WHO-p ajoqutaasumik imigassamik atuineq annikillisinniarlugu nunarsuaq tamakkerlugu periusissiamini imigassat takuneqarsinnaanerannik pissarsiarineqarsinnaanerannillu killilersuinissamik kaammattuuteqarnera siunnersuummi tunngavigineqarpoq.

WHO-p nunarsuaq tamakkerlugu periusissiaminut atatillugu uppernarsaatit ilisimaneqartut ima eqikkarpaa:

- Imigassamik nioqquteqarnermi imigassartortitsinermilu imigassap ersarinnginneruneranik inatsiseqarnerup sunniutai arlalinnik takussutissaqarput.

Kisermaassinerit iluaqutaasut
WHO-p uku ersarissusaannut killiliissutit uppernarsaatissaqarluartut allappaa:

  • Naalagaaffiit kisermaassinermik ingerlataqarfiusut immikkulluunniit akuersissuteqarnikkut pisiniarfinni tuniniaanerit.
  • Pisiniarfiit imigassamik tuniniaanermik ingerlatallit, qanoq qanitsigineri
  • Imigassamik pisisinnaasut ukiuinik killiunneqarsimasunik misissueqqissaarnikkut
  • Imigassanik sassaallerfiusut ammasarfiisa annikillisinnerisigut.

Kisermaassinermut taarsiullugu assiaqusersuinerit
Agathe Fontainip (IA) imigassanik assiaqusersuinissamik siunnersuuteqarnermini kisermaassinermut innersuussutinut tunngasoq tunngavilersuutigaa.

- Sermitsiaq.AG-p eqqoqqissaartumik allaatiginninneratut naalagaaffiit kisermaassillutik imigassamik tuniniaasut imigassamik atuinermut killilimmik sunniuteqartarnerat pillugu WHO-p uppernarsaateqarnera ilumoorpoq. Taamaattumik siunissaq ungasinnerusoq eqqarsaatigalugu kisermaassilluni ingerlatsineq nunatsinni aarlerinartumik imigassamik atornerluinermut aaqqiissutit ilagissaneraat eqqarsaatigissallugu pissutissaqarluarpoq, taanna tusagassiuutinut nalunaarummi allappoq.

- Siunissarli qaninnerusoq eqqarsaatigalugu pingaaruteqarpoq periarfissat anguneqarsinnaasut isiginiarnissaat. WHO-p allanneratut ”najukkami pissutsit, tassunga ilanngullugu isumaginninnikkut, kulturikkut aningaasaqarnikkullu tunngasut, imigassap pissarsiarineqarsinnaaneranut malittarisassiornerup annertussusaanut aalajangiisuussapput”.

- Massakkorpiaq Naalakkersuisut kisermaassilluni ingerlatsinissap atulernissaanut siunnersuut saqqummiutinngilaat. Paarlattuanik pisiniarfiit ulluinnarni pisiassanik nioqquteqartartut imigassat pisiniarfimmi nioqqutissanit allanit assiaquserneqarnissaannik siunnersuuteqarnikkut imigassat takuneqarsinnaanerat pissarsiarineqarsinnaanerallu annikillisinniarparput.

Taassuma aamma assiaqusersuineq kisermaassinertupajaaq ittoq tunngavilersuutigaa.

WHO-mit innersuussutit Sermitsiaq.AG-p misissornerini assiaqusersuinissamik periarfissaq toqqaannartumik allaqqasoq takusinnaanngilaa.

Pisiniarfiit ulikkaannginnerinik qulakkeerinnissinnaaneq, ammasarfiit killilersorneqarnerisigut, pisisinnaanermut ukiunut killigititap malinneqarnerisa qulakkeerneqarnerat kiisalu nioqqutigineqartut killilersornissaat periarfissaatinnissaat, WHO-p misissuinermini kisermaassinerit iluaqutaanerinik inerniliussineranut ilaatigut pissutaapput.

- Naalagaaffiit imigassamik nioqquteqarnermik kisermaassinerat imigassamut attuumassutilimmik ajoqusernernernut annikillisaasarput. Periutsit taamaattut ikinnerusunik pisiniarfeqarnerusarput, pisiniarfinniillu namminersortunit sivikinnerusumik ammaffeqartarlutik, WHO nalunaarusiami 'Evidence for the effectiveness and cost-effectiveness of interventions to reduce alcohol-related harm’ taama allappoq.

Pisiariuminassusaat imaluunniit ersarissusaat
WHO-p misissuinermini aamma innersuussutimini tikikkuminassusaat aalajangiisuusoq naqissuserpaa. Ersarissusaat qanoq sunniuteqarnersoq WHO-mit oqaatigineqarpianngilaq.

Tikikkuminassusaat aamma ersarissusaat imigassamik atornerluinermut sunniuteqartoq Agathe Fontainip aalajangiusimavaa.

- Assiaqusersuinikkut meeqqanut inuusuttunullu pingaarutilimmik ersersinneqassaaq imigassanut tunngatillugu immikkut ittunik malittarisassaqartoq, aamma imigassat nioqqutissanit nalinginnaasunit immikkoortinneqarnissaat assiaqusersuinikkut qulakkeerneqassaaq, taanna tusagassiuutinut nalunaarummini allappoq.

Assiaqusersuineq iluaqutaassasoq qularinngikkaa
Kisianni aamma assiaqusersuinerup iluaqutaaneranik misissuinermut toqqaannartumik unnersuussisinnaanngilaq. Taamaattorli tamanna iluaqutaasoq qularinngivippaa.

- Nunarpassuarnit, imigassap takuneqarsinnaaneranik pissarsiarineqarsinnaaneranillu assigiinngitsutigut annikilliliisimasunit, misilittakkat tunuliaqutaralugit assiaqusersuineq sunniuteqassasoq tunngavissaqarluta naatsorsuutigaarput. Ullumikkut naluarput qanoq annertutigisumik sunniuteqassasoq, aamma misissuinermut ataatsimut aalajangersimasumut innersuussisinnaanngilagut. Qularinngilarpulli inatsimmik allanngortitsineq sunniuteqassasoq, Agathe Fontain (IA) naqissusiivoq.

Imigassamut inatsit aqagu Inatsisartuni naammassillugu suliarineqassaaq.

Agathe Fontainip ilanngussaa tamaat uani atuaruk

Aamma atuaruk: Imigassamik assiaqutsersuinerup iluaqutaaneranik uppernarsaatissaqanngitsoq

Powered by Labrador CMS