Agathe Fontain qineqqusaartoqareersoq siulittaasup tulliatut ingerlaqqippoq
Inuit Ataqatigiinni aaqqissuussaanikkut siulittaasup tulliatut sapaatiummat qineqqusaartoqarmat Agathe Fontainip unammillertini Aaja Chemnitz Larsen ajugaaffigeqqarpaa.
IA sapaatiummat nuna tamakkerlugu ataatsimeersuarnerani aaqqissuussaanikkut siulittaasumut tullinngorniuuttoqarmat naligiittoqarsimaqaaq.
Taasisinnaatitaasunit 33-t Aaja Chemnitz Larsen aaqqissuussaanikkut siulittaasup tullissaatut piukkussimavaat, 35-lli Agathe Fontainimik taasisimallutik, Agathe taamaalilluni siulittaasup tulliatut ingerlaqqippoq.
Múte B. Egede IA-p siulittaasuatut unammillerteqarani partiimillu tapersersorluarneqarluni ingerlaqqippoq. Aqqaluaq B. Egede aamma unammillerteqarani politikkikkut siulittaasup tulliatut ingerlaqqippoq.
Nukiit nutaat misilittagaqarnerluunniit
Aaqqssuussaanikkut siulittaasumut tullinngorniuttut marluk qineqqusaarlutik oqaaseqareermata, ilaatigut Aaja Chemnitz Larsenip suleqatiginnissinnaassuseqarnera angusaqarusussuseqartarneralu pingaartinneqarsimavoq, Agathe Fontainili najukkani immikkoortortaqarfinnut attaveqarluartartut nersualaarneqarluni.
Aaja Chemnitz Larsenip qineqqusaarluni oqaaseqarnermini erseqqissaassutigaa, partiip nukittorsarneqarlunilu ineriartortinneqarnissaa angorusulluinnarlugu.
- Siulersuisuunerit nukinnik nutaanik tunerusuppakka arlalinnillu pisoqartarnissaa isumagerusuppara. Agathe susinnaanerminik takutitsinissamut periarfissaqarsimavoq. Uanga nukissaqarpunga aamma malinnaaniaraanni ullaakkut iteriartoqartariaqarpoq, IA sinnerlugu folketingimi ilaasortaq oqarpoq.
Agathe Fontainip oqaaseqarnermini pingaartillugu oqaatigaa, najukkani immikkoortortaqarfiit siulittaasup tulliatut suliassaminik naammassinnissimanersoq pillugu qanoq isumaqarnersut maluginiarsarisimallugu.
- Sassaqqeqqusisorpassuusimapput, najukkanilu immikkoortortaqarfinnik oqaloqateqartarnera ingerlatiinnassavara, siulittaasup tulliatut ingerlaqqittoq oqarpoq.
Kinullerlu pineqartoq IA-mi ilaasortanit, Agathe Fontainimik qinerseqqissimasunit pingaarnerutinneqarsimavoq.
Borgmesteri allatsinngortoq
Kommuni Qeqertalimmi borgmesteri Ane Hansen partiimi allatsitut qinigassanngorteqqinngitsoq Bendt B. Krisitansen taarserlugu allatsinngorpoq.
Bendt B. Kristiansen partiimi aningaaserisutut toqqagaavoq.