AG piareersarpoq: Takornariaqarnermut aningaasaliissutit amerlivai
Air Greenlandip siunissamut pilersaarutimini anguniarniarpaa takornariaqarnermut tunngatillugu ineriartortitsinermi manna tikillugu annerunerusumik peqataanissani. Taamatut ersersitsivoq siulersuisuni siulittaasoq Bodil Marie Damgaard uani AG-mi apersorneqarnermini.
Piffissami sivisuumi timmisartortitseqatigiit namminersorlutik oqartussanit pigineqartup Air Greenlandip timmisartuutiminut aningaasaliissuteqarneq aamma timmisartuutiminik taarsersuineq aamma SAR pillugu isumaqatigiissutip pingaaruteqartup pigeqqilernissaa tamakkiisumik qitiutissimavai, minnerunngitsumik ingerlatsiviup coronamik nappaalanerup nalaani ullormiit ullormut killilersuisarnerit ingerlatsivimmut annertuumik sunniuteqartartunut tulluarsartuarnissaq.
Aviisi AG taama allappoq.
Coronamik nappaalaneq nunarsuarmi tamarmi akiuussutissamik kapitittarneq malillugu nakkutigineqarsinnaaleraluttuinnarpoq, maannalu Air Greenlandimi aqutsisut ulapputigilerpaat Air Greenlandip naggataatigullu Kalaallit Nunaata Atlantikorsuaq qulaallugu timmisartuussisarnissamut Nuummi aamma Ilulissani mittarfinnut nutaanut, pilersaarutit naapertorlugit 2024-mi piareertussat, aningaasaliissutit iluaqutigilluarnissaasa qulakkeernissaannut.
Angallassisarnermi pisinnaasat annertusinissaat pisariaqarpoq
Siulersuisuni siulittaasup Bodil Marie Damgaardip erseqqissarpaa Air Greenland Kalaallit Nunaanni takornariaqarnermik suliaqartarnermi pingaaruteqartumik inissisimareersoq Greenland Travel, Hotel Arctic aamma World of Greenland aqqutigalugit.
Anguniakkalli suli annertunerujussuupput.
- Angallassisarnermi pisinnaasanik annertusaanissamut aamma suli amerlanerusunik neqerooruteqarnissamut mittarfiit nutaat pisariaqartitsipput, aamma mittarfiit nutaat periarfissaqartitanik pilersitaannik piviusunngortitsissagutta. Ineriartorneq tamanna Air Greenlandip taperserusuppaa aamma Kalaallit Nunaannut tamarmut iluaqutaasumik peqataaffigerusuppaa, Bodil Marie Damgaard ilisimatitsivoq.
Aviisimi AG-mi atuarnerusinnaavutit. Aviisi uani pissarsiariuk: