Skip to main content

AG Ombudsmandimut maalaartoq

Allagaatinik takunnissinnaanissamik Kalaallit Nunaanni Sulisitsisunit AG-millu qinnuteqartoqartuaraluartoq Aalisarnermut Piniarnermullu Naalakkersuisoqarfiup taarsiivigineqarnissamik annertuumik piumasaqartoqarsinnaanera pillugu inatsitigut misissueqqissaarneq tunniukkumanngilaa

Aalisarneq pillugu inatsisissap akuersissutigineqarneratigut Namminersorlutik Oqartussat taarsiivigineqarnissamik annertuunik piumasaqarfigineqarsinnaanerannik Naalagaaffiup eqqartuussissuserisuanit nalunaarusiap takusinnaaneranut Karl-Kristian Krusep Aalisarnermut Piniarnermullu Naalakkersuisiqarfia itigartitsimmata maanna AG ombudsmandimut maalaaruteqarpoq.

Aningaasaliinerit annertuut
Ilaatigut Sulisitsisuni aalisarnermut, inuussutissalerinermut avammullu niuernermut immikkoortortami siulittaasuusimasoq Polar Seafoodimilu siulersuisuni siulittaasoq Henrik Leth inatsit akuerineqassappat eqqartuussivilersuussiniarluni ilimasaarisimavoq.

Taamaattoqarneranimi aalisariutaatillit piffissaligaanngitsumik pisassiissutiminnik arsaarneqarsinnaapput, taamaattoqarneranilu kilisaatinut nutaanut annertuumik aningaasaliinerit kukkusumik tunngaveqarluni ingerlanneqarlutik.

- Soorunami qanoq inissisimanerput pillugu inatsisilerituunit avataaneersunit nalilersuisitsisariaqarpugut, tamatumanilu soorunami pitsaanerpaat atussavagut. Taava taarseeqqusinernut  milliardilikaajusinnaasunut tunngavissaqarnersoq takussavarput, Henrik Leth aggustimi Sermitsiaq.AG-mu toqarpoq.

Allaaserisaq uani atuaruk: Aalisarnermut inatsissami milliardinik nalilimmik taarsiivigeqqussuteqartorqarsinnaavoq

Aamma Royal Greenlandimi pisortaaneq Mikael Thinghuus isumaqarpoq ilimanarsinnaasoq Namminersorlutik Oqartussat pisassiissutit utertinneqarpata taarsiivigitinnissamik piumaffiigneqarsinnaasut. Erseqqissarpaali Royal Greenlandip Namminersorlutik Oqartussanit pigineqartup piginnittuni eqqartuussivilersuussinnaanngikkai.

- Inatsisilerituujunngilanga, taamaattumik tamanna oqaaseqarfigisinnaanngilara. Inuussutissarsiornikkulli inatsisinik aqqusaagaqartarsimavunga, taamaattumik isumaqarpunga inuiaqatigiinnut taarseeqqusissamut tunngavissaqarsinnaasoq Henrik Leth eqqortumik oqartoq isumaqarpunga, Mikael Thinghuus siorna AG-mut oqarpoq.

Aarlerinartua arlaanaataluunniit ilisimassanngilaa
Aamma Aalisarnermut Piniarnermullu Naalakkersuisuoqarfiup nammineq nalilerpaa taarseeqqusissutinik eqqartuussivilersuussisoqarsinnaasoq, inatsisillu tusarniaassutigineqannginnerani Naalagaaffiup eqqartuussissuserisuanut nalilersortinneqarluni allannguinerit pinngitsaaliissummik piginnikkunnaarsitsinerunersut ilaatigullu taarseeqqusisoqarsinnaalluni.

Inatsilli pillugu Inatsisartut ukiaanerani ataatsimiinneranni siullermeerinermi sakkortuumik oqallittoqaraluartoq Krusep Naalakkersuisoqarfiullu Inatsisartuni naalakkersuinermik suliaqartut, tusagassiuutit imaluunniit innuttaasut Naalagaaffiup eqqartuussissuerisuata naliliineranik atuarnissaat itigartilluinnarpaat.

Kalaallit Nunaanni Sulisitsisut marloriarlutik allagaatinik takunninniarsimapput itigartinneqarlutilli. Inatsisartuni aalisarnermut ataatsimiititaliap aamma nalunaarusiaq takusinnaanngilaa, naak tamanna qaammammi kingullermi imaqarniliami neriorsuutigineqarsimagaluartoq.

Pisortat ammasumik ingerlatsinissaat pillugu inatsimmi allassimasut ilaat innersuussutigalugu AG allagaatinik takunnissinnaanermik aamma itigartinneqarpoq, innersuussutigineqarluni allagaatinik takunnissinnaamermi eqqartuussivimmi suliani imaluunniit eqqartuussivilersuussinissaq eqqarsaatigineqartillugu pisortat ilisimasalinnik allaffigeqatigiinnerat tamatumani ilaanngitsoq.

Naalagaaffiup eqqartuussissuserisuata nalunaarusiaa aalisarnermut inatsisissap tusarniaassutigineqannginnerani inniminnerneqarsimagaluarpoq.

Atorsinnaanngilluinnartoq
- Inuiaqatigiit allaallu Inatsisartuni naalakkersuinermik suliaqartut Naalagaaffiup eqqartuussissuserisuata nunatta karsiata milliardilikkaanik taarsiinermi akiliisussanngortinneqarsinnaanera pillugu naliliinera takusinnaanngimmassuk atorsinnaanngilluinnarpoq. Ilisimasat assigiit atorlugit kikkut tamarmik oqallissinnaannginnerisa oqallinneq ajoqusersorpaa. Inatsisip kingunerisinnaasai tamarmik saqqummiunneqartariaqarput, taamaalillutik qinersisartut Inatsisartullu pitsaasunik tunngaveqarlutik aalajangiisinnaallutik sattannatik. Taamaattumik Ombudsmandimut maalaaruteqarpugut, Tusagassiorfimmi Sermitsiaq.AG-mi pisortaaneq AG-milu aaqqissuisuuneq Christian Schultz-Lorentzen oqarpoq.

Aalisarnermut inatsit Inatsisartut upernaakkut ataatsimiinneranni aappassaaneerneqassaaq.

Aviisi AG saqqummertoq atuaruk, uanilu ataani linki atorlugu atuarsinnaavat:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER