AEX Gold misissuinerulersoq
Aatsitassarsiutileqatigiiffik AEX Gold Kujataani sumiiffimmi allami kuultimik ujaasinissamut akuersissummik pissarsisimavoq.
Akuersissut nutaaq atorlugu sumiiffik, Saarloq, 818 kvadratkilometerisut annertutigisoq ujaasiffigineqassaaq, AEX Gold sisamanngormat nalunaaruteqarnermi ilisimatitsivoq.
Ingerlatseqaigiiffik Nalunami kuultisiorfimmik aallartitseqqinniarluni suliniuteqarpoq, Kujataani misissuinissamut akuersissutinik arlalinnik peqarluni.
Inagerlatseqatigiiffik naapetorlugu, AEX katillugi 1646 kvadratkilometerisut annertutigisumi misissuinissamut maanna akuersissuteqarpoq.
Pisortaq: Nuna pingaarutilik
Ingerlatseqatigiiffimmit ilisimatitsissutigineqarpoq, GEUS-ip siusinnerusukkut misissuisimanerata takutissimagaa, sumiiffik AEX Goldip ujaasiffiginissaanut akuersissuteqarfia kuulteqartoq.
- Nuannaarutigaarput Saarlumi misissuinissamut akuersissummik qulakkeerinnissimanerput. nuna Kujataani pingaarutilik, AEX Goldimi pisortaq Eldur Olafsson oqarpoq.
Ingerlatseqatigiiffik naapertorlugu, akuersissut nutaaq AEX Goldip 2020-mi aningaasaqarneranut artukkiissanngilaq. Tamatumunnga pissutaavoq, Naalakkersuisut coronap ajornartorsiortitsinera pissutigalugu ujaasinermi pisussaaffiit ukioq manna atuutsinneqannginnissaannik aalajangersimanerat.