Adventure Guidesimi ilinniartut assaaqataasut

Adventure Guidesitut ilinniartut augustimi atuarnertik Kangerlussuarmi aallartippaat. Sumiiffiup ungasinngisaani, Aasivissuit nunataani Nunatta Katersugaasivianit aamma Sisimiut Nunarsuarmioqatigiit kingornussaat pillugit allattoqarfimmit assaajartortut alakkarneqarput.

Nunarsuarmiut kingornutassaanni, Aasivissuit nunataanni, ilinniartut piujuaannartitsineq aallaavigalugu takornarialerisinnaanermik ilinniartinneqarput.

Campus Kujalleq tusagassiorfinnut taama nalunaaruteqarpoq.

- Nunataq nunarsuarmiut kingornutassaasa allattorsimaffianiittoq takornariaqarnerulernissamut periarfissagissaartitsivoq, aammali nungullalernissaa asiuartulernissaalu aarlerinartunut ilaasinnaalluni. Taamaammat sumiiffiup piujuartitsineq aallaavigalugu atorneqarnissaanut malittarisassaliornissaq pisariaqarpoq, Campus Kujallermi takornarialerinermut ilinniartitsinermut pisortaq, Rie Oldenburg allappoq.

Nuna ilinniartitsissutitut atorlugu

Ilinniartut assaasuni ulluni pingasuni peqataapput. Peqataanerminni piniarfiusimasut ukiunilu 4.500-ni najugaqarfigineqarsimasut takuaat.

Itsarnisarsiuut assaareernerminni nunap assanneqarsimaneranut qimannginnerani aaqqeqqinnissaanut, ilinniartut aamma siunnersuuteqartinneqarput. Sumiiffimmi nikissimanngitsutut qimanneqartussaavoq.

- Ilinniartut siunnersuitinneqarput sumiiffiup takornariaqarsimaneranik ersittuerutsinnissaannut. Takornariallu qanoq pissarsinerusinnaanissaannut aamma isumassarsillutik, ilinniartitaanermut pisortaq oqarpoq.