Admirali soraarneq: USA-p Kalaallit Nunaannik soqutiginnilerneranut russit raketsimik igeriuttakkamik nutaaliaasumik inerisaasimanerat pissutaavoq

Kontreadmiralitut soraarnerup Torben Ørting Jørgensenip nalunngila, USA-p Kalaallit Nunaanni pilersaarutiminik atuutsitsilernissaanik isumaqarluni oqarnini amerlanerit isumaannit ingasannerusoq.

- Tamanna nammineq akisussaaffigaara. Kingusinnerusukkullu paasinarsippat allatorluinnaq pisoqartoq, aamma oqaatsikka kukkusuusut inuit paasigunikku qitutsilivissappata, kisimiillunga tamanna atorumaarpara, admirali Issittulerngusaanneq pillugu Christiansborgimi folketingip illersornissamut ataatsimiititaliaata aamma peqatigiiffiup Folk og Sikkerhedip ullumi isumasioqatigiissitsinerani oqarpoq.

Amerikamiut Issittumut tunngatillugu soqutiginnikkiartuinnarnerat, Donald Trumpip Kalaallit Nunaat pisiariniarlugu neqeroorutigimmagu erseqissilluinnarpoq, tamatumali pisup ukiup affaata siornagut nunanut allanut ministeri Mike Pompeo Issittummi Siunnersuisoqatiginni uissuumminartumik oqalugiarpoq, tassani Ruslandip Kinallu Issittumi suliaqarnerat sakkortuumik isornartorsiorpaa. Illuatungaatigut Amerikamiut Kalaallit Nunaannut qujageqqusaarnerat takuarput, tamanna kingullertigut Amerikamit aallartitat qaffasissumik inissisimasut Nuummut tikeraarnersigut aamma Jeppe Kofodip Mike Pompeomut pulaarnissaanut Ane Lone Baggerip peqataanissamut qaaqquneqarneratigut ersersinneqarpoq.

Sikunik aserorterutit pingasuinnaat

Amerikamiut soqutiginnikkiartuinnarnerat Ruslandip Issittumi sakkutooqarfimmik ammaaneranut annertusaaneranullu qisuariarnertut maannammut nassuiaatigineqartarsimavoq.

Torben Ørting Jørgensenilli tamanna allatut nassuiarpaa. Ilatigut pissusissamisoorsoraa, Ruslandip sakkutooqarfinnik sikumit illersorneqarunnaarsimasunik annertusaanissamik pisariaqartitsinera. Siullertulli Amerikamiut qisuariaataat, saassunneqarsinnaanermut imminut illersornissamut, sammiveqarpasittut isumaqarpoq. Pilersaarutaaginnarsimagaluarpoq, sikunik aserorterutinik pingasunik sananissaq, aallaqqaammut Qalasersuarmut Kujallermut inissinneqartussaasimasunik. Sakkutuut imarsiortut umiarsuaat marluk atoqqinneqalersimagaluarput, issittumili atugassarititaasut ataanni sorsunnissamut piareersartoqanngilaq.

Raketsimut igeriuttakkamut illersuutissaqanngilaq

Akerlianik kontreadmiralitut soraarneq isumaqarpoq, Amerikamiut Kalaallit Nunaannik soqutiginninnerannut russit raketsimik igeriuttakkamik nutaaliaasumik inerisaasimanerat pissutaasoq. Raketsi igeriuttagaaq hypersoniskiusutut taaneqartartoq, sukkasuupilussuarmik timmisinnaavoq aqqutaanilu allamut sangusinnaalluni. Amerikamiut raketsinut igeriuttakkanut illersornissamut atortuannut akiuunniarluni ineriartortitaavoq.

Raketsip igeriuttakkap pisinnaasai eqqarsaatigissagaanni, qanoq qisuariarniarluni aalajangiinissamut piffissaqarpallaartoqassanngilaq. Tamatuma saniatigut raketsi aqqutaani allamut sangusinnaammat, sumut tussanersoq siumoortumik oqaatigineqarsinnaanngilaq.

- Taama ittumut sumilluunniit illersuutaasinnaasumik maannakkorpiaq peqanngilagut, Torben Ørting Jørgensen oqarpoq.

Amerikap kitaata sineriaanik illersuineq

USA raketsinit hypersoniskiusunit taakkunannga ulorianartorsiortinneqarnermut illoqarfissuarnik kangiata sineriaaniittunik illersuilissagaluarpat, Kalaallit Nunaata USA-p Ruslandillu akornanni inissisimanera pingaaruteqartussaavoq.

- Taamaammat sapiillisaarlunga oqaatigissavara, Amerikamiut Kalaallit Nunaannik soqutiginninnerannut tunngaviusut, kallerinneqarnissamut piffissap annikillisinneqarneranik paasisaqarneq, sumiissusersiuiniarnermi ulorianartorsiortitsisumullu iliuuseqarnissamut ajornartorsiuteqalernissaqmaluginiutinik amerlanernik immaqalu ulorianartoq akiorniarlugu sakkunik inissiinissamik eqqarsaasersortariaqalernissaq, Kalaallillu Nunaat periarfissatut tassani erseqqilluinnarpoq, Kalaallit Nunaanni tunup avannaarsuata inoqarpiannginnera pissutigalugu, Torben Ørting Jørgensen taamatut naliliivoq.