Adjunkti: Múte ulapingaatsiartussanngorpoq
Naalakkersuisut Siulittaasuat nunanut allanut tunngasunut suliaqarnermini ulapingaatsiartussaassaaq, namminerlu tunuliaquttaminut piffissakinnerulersinnaanera aarlerinarsinnaavoq, Rasmus Leander Nielsen naliliivoq.
Naalakkersuisut siulittaasuata nunanut allanut tunngasunut akisussaaffimmik tigumminnittuusarnera takornartaanngilaq. Namminersornerullutik Oqartussaanerup nalaani atuuttarsimavoq, soorlu Josef "Tuusi" Motzfeldtip 2000-ikkut aallartinnerani akisussaaffigisimagaa. Aleqa Hammondip aamma Kim Kielsenip akisussaaffik aamma piffissami sivikitsumi tigummisarsimavaat.
Ilisimatusarfimmili adjunktip Rasmus Leander Nielsenip tupaallaatigaa Múte B. Egedep (IA) nunanut allanut tunngasunut naalakkersuisoqarfik Pele Brobergimit (N) maanna tigummagu. Nunatsinniimmi nunanut allanut tunngasunut politikkimik suliaqarneq siullermernit annertunerulersimavoq, suleqatigiissuteqarfiillu ataavarnerusumik ingerlanneqalersimallutik.
Sermitsiaq.AG- mut taama oqarpoq.
- Tupaallannarpoq, tassami Múte B. Egede nunanut allanut tunngasunut suliaqarnermut piffissangaatsiarujussuaq atortussanngussavaa, Naalakkersuisunilu kiisalu partiimini Inuit Ataqatigiinni attaveqarneq annikinnerusumik piffissaqarfigilissallugu, Rasmus Leander Nielsen oqarpoq.
Naapeqatigiittoqartoq
Pele Broberg nunatta namminersulivinnissaanut kikkut taasisinnaaneranik apeqqummik qaqitsereernerata kingorna nunanut allanut tunngasunut naalakkersuisutut tunuartinneqaepoq. Taama kisimiilluni nalunaarneq akisussaaffimmik annertuumik annaasaqarnermik Naleqqameersup akilerpaa.
Naalakkersuisoqatigiilli taama nutaajutigitillugit qinersisitsisoqarnissaanut periarfissaqartoqarsimanngitsoq, Rasmus Leander Nielsenip nalilerpaa.
- Naalakkersuisoqatigiit ukiup affaa atareerlutik qinersisitsisoqassagaluarpat tamanna ajorsarnerujussuartut isigineqartariaqarpoq. Taamaammat IA-mut pingaaruteqarsimavoq ataqatigiissinnaanerup takutinnissaa. Pele Brobergilu, Naleqqap siulittaasussaatut inissisimammat, Naalakkersuisoqatigiinnit piiginnarnissaa akissaqarfigineqanngilaq. Taamaammat akisussaaffiit marluk suli tigummivai, oqarpoq nangillunilu:
- Naalakkersuisoqatigiit nikisinneqarnerat "niueqatigiinnertut" taaneqarsinnaagunarpoq. Múte B. Egedep nunanut allanut tunngasunut naalakkersuisuuffik tigugaa, Naleqqamit Paneeraq Olsen meeqqanut, inuusuttunut ilaqutariinnullu naalakkersuisoqarfimmik akisussaaffeqalerpoq.
Qiteqatigiinneq oqinnerulerpoq
Pele Broberg nunanut allanut tunngassuteqarsinnaasunut siullermeerluni oqaaseqalinngilaq. Ilaatigut aamma issuarneqarsimavoq Danmarkimisut illersornissaqarfimmik nunarput peqassanngitsoq, taamaattorli Island assigalugu sinerissami sillimaniartunik peqarnissaq orniginartinnerullugu.
Múte B. Egede aamma ersarissunik isummersinnaasaraluartoq nunanullu allanut tunngatillugu nunarput periarfissaqarnerunissaanik oqariartuuteqartarsimagaluartoq, taamaattoq Rasmus Leander Nielsen isumaqarpoq nunatta Danmarkillu akornanni attaveqarneq maanna eqqissisimanarnerulissasoq.
- Ilisimanngilarput nunanut allanut tunngasunut naalakkersuisoqarfiup siuliuttaasoqarfiup ataaniilernera aaqqiipallannerunersoq atuutivittussanngortinneqarnersorli. Ilimagaarali Københavnimi udenrigsministeriaqarfimmi maanna eqqissiallattoqartoq akisussaaffiup allamit tiguneqarnera pillugu, taamatullu Kalaallit Nunaata Danmarkillu akornanni nunanut allanut tunngasunut suliani ataqatigiiaarisoqarnerunissaanik naatsorsuuteqartoqartoq, Rasmus Leander Nielsen oqarpoq.