Sisimiut Kangerlussuullu akornanni aqqusineq inuussutissarsiornermut siuariartornermullu tunngavoq.

Sisimiut Kangerlussuullu akornanni aqqusineq atulerpat, nunatsinni takornariartitsinermut tunngatillugu annertuumik ineriartortitsinissamut periarfissaq Arctic Circle Businessip pingaartumik takusinnaavaa. Arctic Circle Business tusagassiuutinut nalunaarummi allappoq.

- Pingaaruteqarluinnarpoq paasissallugu, Arctic Circle Road inuussutissarsiornikkut ineriartornissamut siuariartornissamullu tunngammat. Immap Sermersuullu akornganni aqquserngup misigisassanut ineriartortitsinissamut ammaasissammat, aammalu inuussutissarsiornermut tunngasut allat ilisimatusarnermullu periarfissat, ACB-mi pisortaq, Jesper Schrøder, tusagassiuutinut nalunaarummi taama oqarpoq.

Namminersorlutik Oqartussat attaveqaatitigut soorlu mittarfinnut aningaasaliinikuunermini nunap immikkoortui aamma attaveqaatit ineriartortinnissaannut akisussaaqataasoq, taassuma oqaatigaa.

Pinngortitamut ammaassisoq

Aqqusineq qitiutillugu misigisassarsiortitsilluni takornariartitsineq tamakkiisumik ammaanneqarsinnaavoq, ACB taama isumaqarpoq, Sisimiut Kangerlussuullu akornanni aqqusineq oqaluuserineqaleraangat Kangerlussuup siunissaa eqqaaneqartartoq tassani uggorineqarpoq.

- Takorniariaqarsinnaanerup sivisussusaa Kalaallit Nunaanni takornariaqarnerup attatiinnarneqarsinnaanissaanut pingaaruteqarpoq, taamatullu Arctic Circle Road ukioq kaajallallugu misigisassaateqassalluni. Tamatumanilu pinngortitarujussuaq Sermersuup davidstræde-llu akornganiilluni, Kalaallit Nunaanni kisiartaalluni, takornarissanik amerlasuunik ukioq kaajallallugu tigooraasinnaasoq. Taamaakkaluartoq pinngortitamut misigisassat ajoqusinngikkaluarlugit, sumiiffimmiittullu inuit annertuallaamik artukkinngikkaluarlugit, ACB allappoq.

Atorunnaarsitsinani ineriartortortitsineq

Arctic Circle Road inuiaqatigiit aningaasaqarnerannut annertuumik iluaqutaasinnaallunilu siunissami nunap immikkoortuanik ineriartortitsinermik qulakkeerinnissinnaasoq, ACB-mi pisortaq oqarpoq.

Nunat avannarliit allat mittarfinnit pinngortitaqarfimmut aqqusinernik atuisartut, Jesper Schrøderip oqaatigaa, taakkulu sumiiffinni takornariaqarnikkut siuariartornermik pilersitsipput.

- Neriuutigaarput taakkunaniit nunanit misilittakkat, politikikkut paasinninnermik pilersitsissasut, nunatta immikkoortua pingaaruteqarluinnarmat, ACB-mi pisortaq Jesper Schrøder allappoq, Sisimiut Kangerlussuullu akornanni aqqusinermullu tunngatillugu ineriartortitsinissamut periarfissat pillugit oqallilluartoqarnissaanik kissaassilluni naqissusiivoq.

Qeqqata Kommunia aamma ACB nunap immikkoortuanut ineriartortitsinissamut ataatsimut pilersaarutinik saqqummiussinissamut 24. april Hotel Hans Egedemut qaaqqusipput.