Abelsenip Olsvig paarlassavaa
Politikkeriusimasup Maliina Abelsenip Sara Olsvig UNICEF-ip Kalaallit Nunaanni suliniutaanut pisortatut paarlassavaa.
44-nik ukiulik Maliina Abelsen UNICEF-ip Kalaallit Nunaanni suliniutaanut pisortatut aggustusip qulingani sulilissaaq. Tamanna pissaaq maanna suliniutinut pisortap Sara Olsvigip Ph.D-mi suliniuteqarluni aallartinneranut atatillugu.
UNICEF taamatut ilisimatitsivoq.
Maliina Abelsen Air Greenlandimi aningaasarsiornermut pisortatut siorna oktoberip qaammataani taamaatippoq. Siusinnerusukkut Inuit Ataqatigiinni politikkeriusimavoq, ilaatigullu Isumaginninnermut Naalakkersuisutut atuussimalluni:
- Kalaallit Nunaanni meeqqat nipaat pisinnaatitaaffiilu eqqumaffigineqarneruleriartortut malugisimavarput, sulili anguniagassaqaqaaq. UNICEF-ip Kalaallit Nunaanni suliaasa, tassaasut suleqateqarnerit, suliniutit paasititsiniaasarnerillu ineriartorteqqinneqarnissaannut qilanaarpunga, Maliina Abelsen oqarpoq.
Pisinnaatitaaffiit pillugit ilinniarfissanik pilersitsiniarluni suliaq ingerlateqqissagaa
Generalsekretær i UNICEF-imi generalsekretærip Karen Hækkerupip Maliina Abelsenimit atorfinitsitsineq nuannaarutigaa:
- Maliina Abelsen Isumaginninnermi Naalakkersuisuusimasutut, inuiaqatigiit tamarmiusut kalaallit meerartaannut tunngatillugit qanoq akisussaaffeqarnerannik ilismasaqarluarpoq – akisussaaffeqarneq maannakkorpiaq ukkatarisarput, Karen Hækkerup oqarpoq.
Maliina Abelsenip ilaatigut Kalaallit Nunaanni sumiiffinni assigiinngitsuni pisinnaatitaaffiit pillugit ilinniarfissanik pilersitsiniarluni suliaq ingerlateqqissavaa, ilinniarfinni pineqartuni meeqqat pisinnaatitaaffimminnut tunngatillugit ilinniartassapput. Aamma UNICEF-ip NAKUUSA aqqutigalugu Namminersorlutik Oqartussat suleqatigalugit suliniutai ingerlatseqqissavai:
- UNICEF-ip Kalaallit Nunaanni meeqqat pisinnaatitaaffiinut tunngatillugit suliarisartakkaminik nukittorsaaqqinniarnera qilanaaraara. Meerartatta timikkut tarnikkullu peqqissuullutik ineriartornerat imminut napatilluni ineriartornissamut tunngaviulluinnarput, Maliina Abelsen oqarpoq.