Abelsen: Innuttaasut peqqinnerunissaminnut akisussaaffimmik tigusinerusariaqarput

Innuttaasut peqqinnissaqarfimmit suut naatsorsuutigisinnaavaat? Peqqinnissaqarfiullu pitsaanerpaamik sullissisinnaanera anguniarlugu innuttaasut qanoq iliortariaqarpat?

Inatsisartuni ilaasorta 16-it, peqqinnissaqarfimmi aqutsisut, nakorsaaneq peqqinnissaqarfimmilu sulisut pingasut kiisalu peqqissutsimut naalakkersuisoq, Martha Abelsen (S), ippassaq ataasinngornermi oktoberip 14-ani isumasioqatigiipput.

Isumasioqatigiinnerup siunertaraa peqqinnissaqarfiup iluani siunissami naatsorsuutigineqarsinnaasut qulakkeernissaat.

- Innuttaasut peqqissuunissaminnut akisussaaffimmik tiguseqataasariaqarput. Peqqinnissatsinnut akisussaaffik tigugutsigu peqqissumillu inuuneqarutta, taava peqqinnissaqarfiup napparsimasut sullilluarnerusinnaavai. Peqqinnissaqarfimmi sulisut taama oqariartuuteqarput, Martha Abelsen Sermitsiaq.AG-mut oqarpoq.

Ulluinnarni sulineq

Nakorsaanerup peqqinnissaqarfiup iluani katsorsaatitut neqeroorutaasut saqqummiuppai, peqqinnissaqarfimmilu aalajangersimasunik suliaqartut pingasut ulluinnarni suliaminnik aamma saqqummiipput.

Peqqinnissaqarfimmi aqutsisut, peqqinnissaqarfiup iluani aningaasaqarnerup qanoq inneranik, katsorsaanermullu neqeroorutit aningaasaqarnermit qanoq sunnerneqartarnerannut tunngatillugu aamma saqqummiipput.

Naalakkersuisup erseqqissaatigaa sulisoqartitsineq katsorsaanerlu pineqartillugit, aningaasat sorlermut atorneqarnissaat apeqqutaalertartoq.

- Eqqarsaatigisariaqarparput sulisoqartitsiniaannarluta sulisoqartitsisassanerluta. Aningaasat sulisoqarnermut atortut napparsimasunut katsorsaanermut atorneqarsinnaagaluarput. Sulinitsinni tamanna aamma eqqarsaatigisariaqarparput, Abelsen oqarpoq.

Peqqissutsimut naalakkersuisoqarfik 2019-imi aningaasanut inatsimmi 1,5 milliardit koruuninik aningaasalerneqarpoq. Aappaagumut aningaasanut inatsisissatut siunnersuummut naalakkersuisoqarfik 1,5 milliardit koruuninik aningaasalerneqassaaq. Aningaasaqarnermut Siunnersuisoqatigiit nalunaarusiata ersersippaa peqqinnissaqarfik nunat tamalaat aningaasalersuineranut sanillersuussinnaassappat, taava peqqinnissaqarfik 400 milliuunit koruuninik suli amigaateqarpoq.

Sammisat tallimat eqqartorneqarput

Inatsisartuni ilaasortat peqataasut sammisanik arlalinnik eqqartuipput:

Ernisarfiit, taakkunanilu upalungaarsimanissamut tunngatillugu pilattaasarnerup pingaaruteqassusia.

Kræftimik napparsimasut katsorsartinneqartarnerat aamma katsorsartinnerup ingerlanissaata qulaajarneqarnera.

Sulisoqarneq sulisussarsiornerlu, tassani siunnersuutigineqarpoq nuna tamakkerlugu sianertarfimmik ataatsimik pilersitsinissaq.

Isumasioqatigiissitsinermut pilersaarut, Sermitsiaq.AG-p pissarsiarisimasaa naapertorlugu, kigutit narlorsartinneqartarnerannut neqerooruteqartarneq, Kalaallit Peqqissartut Illuat aamma napparsimasut ingiallorteqartarnerat sammisassatut siunnersuutinut aamma ilaapput.

- Isumasioqatigiinnermi tamatta naqissuserparput erninermi pilattaaratarsinnaanermut upalungaarsimanissap pingaaruteqassusia. Anaanaasumut meeqqamullu sillimanissaq qitiulluinnarpoq. Aamma eqqartorparput ernisarfiit pitillugit allanngortoqarnerani innuttaasunut ersarinnerusumik paasisitsiniaanissaq pisariaqartoq, allanngortoqarneranut suut tunngaviunersut pillugit, Martha Abelsen nassuiaavoq.

Sulineq ingerlaqqissaaq

Peqqissutsimut naalakkersuisup Martha Abelsenip erseqqissarpaa peqqinnissaqarfiup iluani aaqqissuusseqqinneq suli ingerlaqqissasoq, Inatsisartullu upernaakkut 2020-mi ataatsimiilerpata peqqinnissaqarfiup iluani sullissinerup naatsorsuutillu suusinnaaneri pillugit siunnersuuteqassalluni.

Peqqissutsimut naalakkersuisoq Martha Abelsen aalajangiusimavoq Inatsisartut nutaamik isumasioqatigiinnermut qaaqqussanagit, taamaattoq Inatsisartuni peqqissutsimut ataatsimiititaliaq qanimut suleqatigalugu peqqinnissaqarfiup iluani aaqqissuusseqqinnermi suliaq ingerlanneqassaaq.

Susassaqartunut isumasioqatigiissitsineq

Susassaqartut, soorlu nakorsat peqatigiiffiat aamma PPK allallu, peqatigalugit assigusumik isumasioqatigiissitsinissaq maanna siunniuppaa. Isumasioqatigiissitsinissaq qaqugu pissanersoq suli aalajangerneqanngilaq.