Aatsitassat: Múte eqaannerusumik sulinissamik piumasaqarpoq
Nunatsinni naalakkersuinikkut pissaanermik nikittoqarnissaa aatsitassarsiornermik suliaqartut neriuutigisinnaavaat. Tassami aatsitassarsiornermik suliaqartunit isornartorsiut annertooq IA-mit aamma Demokraatinit pingaartinneqarniarpoq, taakku ullut ilaanni naalakkersuisoqatigiinnermut isumaqatigiissusiornissaq isumaqatiginninniutigissagunikku, allaffissornikkut aaqqissuussaaneq allanngortinniarpaat.
Aatsitassarsiornermik suliaqartut qinnuteqaataat siunissami naalakkersuisoqarfimmit ataasiinnarmit suliarineqartassapput.
Inuussutissarsiornermut naalakkersuioqarfiup inuiaqatigiit aningaasaqarnerannut tunngasunut apeqqutit ullumikkut akisussaaffigai, tamannalu aatsitassarsiortunut aporferujussuartut misigineqartarpoq, sullissineq sivisooq ukiuni arlalinni ingerlasinnaasartoq.
- Aatsitassarsiornermi siuariartornermik pilersitsiniarnermi aporfiit annersaat tassaavoq allaffissornikkut aaqqissuussaanermi matoqqanerujussuaq, IA-mi siulittaasoq Múte B. Egede naqissusiivoq, taanna ukiup aappaa avillugu aatsitassarsiornermut naalakkersuisuunikuuvoq, taassumalu aatsitassarsiortut qinnuteqaataat naalakkersuisoqarfiit marluk akornanni uteqattaartinneqartarnerat paasisaqarfiginikuuaa.
- Ataasiinnarmik isaaveqarneq atuutilerseqqissavarput, tassani aalajangiinerit aatsitassarsiornermut tunngasut naalakkersuisoqarfimmut ataatsimut inissinneqassallutik – tassa aatsitassanut naalakkersuisoqarfimmut, Múte B. Egede oqarpoq.
Taassuma isumaa naapertorlugu suliaq ataaseq tamakkiisumik ukattarineqartarnissaa tamatuma iluaqutissartaraa.
Aatsitassarsiornermut ataatsimiititaliami ilaasortamit Randi Vestergaard Evaldsenimit Demokraatineersumit taperserneqarpoq, taanna aamma taamatut eqqarsaateqarpoq.
- Sulineq pisariillisassavarput. Nunarput nutaanik pingaarutilinnillu isertitaqarnissaa qulakkeernissaa neriuuteqarfigissagutsigut eqaannerulersissavarput, IA-mi politikeri nassuiaavoq, taanna ulluni makkunani nunarsuarmi aatsitassarsiortut saqqummersitsiviisa annersaat – PDAC – Torontomi peqataaffigaa.
- Inuussutissarsiornermut naalakkersuisoqarfik unitsitsisartutut misigineqartartoq aatsitassarsiornermik suliaqartorpassuarnit tusartarparput. Tamanna allanngortissavarput, IA-mi siulittaasoq oqarpoq.
Apeqqutit avatangiisinut tunngasut avatangiisinut naalakkersuisoqarfimmiiginnassapput, suliffeqarfissuit sinaakkutaannut piumasaqaatinut aamma qinnuteqaatip nalilernissaanut tunngatillugu avatangiisinut ingalassimatitsisoqarnissaanut pitsaasuusoq isumaqarami.
Allaffissornermi aaqqissuussaanermi pissaaneqartunik suleqtigiuminaattoqartoq, taanna isumaqarpoq.
- Tassunga tunngatillugu suliassaqarfik politikkikkut aqunneqarnissaa aamma anguniagaqarfiunissaa pisariaqarpoq.
Kalaallit Nunaat aatsitassarsiornermi iluatsitsissaguni allannguutit pisariaqartut, Randi Vestergaard Evaldsen naqissusiivoq.
- Inuiaqatigiit aningaasaqarnerannut tunngassutillit aatsitassarsiornissamut suliat inuussutissarsiornermut naalakkersuisoqarfimmit aatsitassanut naalakkersuisoqarfimmut nuunneqarnissaannut, Naalakkersuisut siulittaasuata aalajangersinnaavaa imaluunniit oqaluuserisassanngortissinnaavaa, Demokraatini siulittaasuusimasoq oqarpoq.