Aatsitassat: Kalaallit Nunaat aningaasaliiffissat allattorsimaffianni appariarujussuarpoq
Aatsitassarsiornermik suliaqartut aningaasaliiffissatut pilerinarnertut naliliiffigisaanni allattorsimaffimmi Kalaallit Nunaat appariarujussuarpoq. Kisianni misissuineq isornartorsiorneqarpoq.
Kalaallit Nunaat 2017-imi aatsitassarsiornermik suliaqartut isaannit aningaasaliiffissaqqinnerpaani 34-imut inissippoq. Kalaallit Nunaat maanna inissisimaffinnik 29-nik ajornermik inissisimalersimasoq paasinarsivoq, 63-imut inissikkami.
Canadami Fraser Institutip nunani 83-ineersuni suliaqartunik ukiumoortumik apersuinermik immersuititsinerani tamanna atuarneqarsinnaavoq.
Ukiuni tallimani kingullerni Kalaallit Nunaata inissisimaffik aatsaat taama ajortigisoq anguaa. Nunat 83-it misissuinermi ilaapput, taamaalilluni Kalaallit Nunaat ajornerpaamut inissisimaffiit taamaallaat 20-inik pitsaanermik inissisimavoq.
Kisianni Fraser Institutip misissuinera aatsitassanut naalakkersuisoqarfimmi pisortap Jørgen T. Hammeken-Holmip tatiginngilaa.
Piumasaqaatik kinaassusersiortut
- Inissisimaffinnik 20-nik siuariarneq kinguariarnerluunniit tupaallaatiginngilara. Misissuineq piviusorsiortumik tigujuminaatsippara, kinaasusersiornermik tunngaveqarnera pissutigalugu, taamaalillunilu suliaqartunit tunngaveqarani, Jørgen T. Hammeken-Holm, Sermitsiaq.AG-mut taama oqarpoq.
- Qanoq amerlatigisut aperineqarsimanerat ajornartorsiutaavoq. Maluginiarpara qulit missaannaasa Kalaallit Nunaat aningaasaliiffissatut nalilersimagaat, naalakkersuisoqarfimmi pisortaq nassuiaavoq, misissuinernut allanut tatiginarnerusunut soqutiginninnerulluni taassuma oqaatigaa.
- Assersuutigalugu Mining Journalip misissueqqissaarnera ”Investment Risk Index” toqqarusunneruara, taanna attuumassuteqanngitsunik tunngavilersorneqarpoq, Jørgen T. Hammeken-Holm ilisimatitsivoq.
Finland aamma angusarliorpoq
Fraser Institutip Finland 2017-imi aatsitassarsiornermik suliaqartunit pitsaanertut inissippaa. Kisianni 2018-imi nunani pitsaanerit tallimat akornanni ukiut arlallit inissisimareerluni 17-imut appariarpoq.
- Nunat qanoq nikerartigineri tamatuma takutippaa, uangalu paasinninnera naapertorlugu Finlandip aatsitassarsiornermi piumasaqaatit allanngortinnikuunngilai, naalakkersuisoqarfimmi pisortaq oqarpoq.
Fraser Institutip allattorsimaffiani Nevada pitsaanerpaatut inissisimavoq,Western Australia tulliulluni.
Kalaallit Nunaata inissisimaffia
Inissisimaffik / Nunat amerlassusaat
2018: 63 / 83
2017: 34 / 91
2016: 55 / 104
2015: 26 / 109
2014: 42 / 122
2013: 7 / 112
Aatsitassarsiorneq pillugu ataatsimeersuarneq
Inuit 70-it missaanniittut nunatsinni inuussutissarsiornermit angalaqatigiit nunarsuarmi aatsitassarsiorneq pillugu ataatsimiinnerni annersaannut, Torontomi PDAC-imut aallarnissaat sioqqullugu Fraser Institutimit nutaarsiassatsialaanngitsoq saqqummerpoq, tassani Kalaallit Nunaat aatsitassarsiornermik suliaqartunut aningaasaliiffissatut nittarsaanneqassaaq. Kunngissaq Fredeik ilaatigut ammaanersiornermi peqataassaaq, kunngissallu Greenland Dayimi peqataanissaa aningaasaliisartunit suliaqartunillu soqutigineqarnissaa annertuumik neriulluarfigineqarpoq.
PDAC-imi ataatsimiinneq aatsitassarsiornermut tunngasuni annersaavoq, inuit nunarsuarmit tamaneersut 25.000-t aamma 30.000 tungaannut amerlassusillit peqataanissaat naatsorsuutigineqarpoq.