Aatsitassat pillugit suliassanik suliaqartarneq sukkatsinneqassaaq

Aatsitassarsiorluarnissamik anguniagaqarneq maannamut suli anguneqanngilaq. 2014-imi isumaqartoqaraluarpoq, aatsitassarsiorfiit pingasuniit tallimanut amerlassusillit ullumikkut ingerlanneqaleersimassasut, maanna aatsitassanut tunngatillugu periusissiami takuneqarsinaavoq. Aatsitassarsiorfiit mikisut marluk ullumikkut ingerlanneqarput.

Tamatumunnga pissutaasut pingaarnerit ilagaat, aatsitassarpassuit piffissap ilaani nalikillisimanerat.

Tamannali kisimi pissutaanngilaq, aatsitassanut tunngatillugu periusissiami nutaami Naalakkersuisut maanna tusarniaassutigalugu nassiussaanni allassimavoq.

- Aatsitassanut oqartussaq ullumikkut Naalakkersuisoqarfinni aamma allaffissornikkut immikkoortortani arlalinniippoq. Tamatuma kingunerisaanik aatsitassarsiornissamut akuersissummik qinnuteqaatip aalajangiisussat arlallit aqqusaartussaasarpai, taakkua ullumikkut ajoraluartumik tamatigut pitsaanerpaamik suleqatigiittaratik. Tamatuma pitsaanerpaamik pisoqarpat malitsigisinnaavaa qinnuteqaatinut sulianik ingerlatitsinerup sivisunera, ajornerpaamillu pisoqarpat qinnuteqartut ilaasa Kalaallit Nunaanni aningaasaliinissaq taamaatissinnaavaat imaluunniit qimagulluinnarsinnaallutik, periusissiami taamatut allassimasoqarpoq.

Nunatullu aatsitassarsiorfeqanngitsutut oqimaatsumik ajornakusoortumillu sullissineq eqquinerlungaatsiarsinnaavoq.

- Kalaallit Nunaanni ujarassiornikkut periarfissaqarfiusut annertoorujussuupput, Kalaallit Nunaat tunngavissani allani nunanik aatsitassarsiorfiusunut ingerlallualereersimasunut allanut unammilleqateqarnermi nukittunnginnerusumik inissisimalluni. Taamaattumik atugassarititaasunut killissaliussat sapinngisamik suliffissuarnut aalajaatsuunissaasa qulakkeernissaanut Kalaallit Nunaanni oqartussat iliuuseqartariaqarput. Tassani ilaatigut pineqarput inatsisit allanngoranngitsut kiisalu akileraartarnermi aamma royaltynut periaaseq unammillersinnaassuseqartoq.

Taamaammat sullissisarneq maanna sukkanerulersinneqassaaq, ajornaannerulersinneqassaaq paasiuminarninngortinneqassallunilu.

Ajornaannerusoq, sukkanerusoq paasiuminarnerusorlu

Aatsitassanut tunngatillugu oqartussat saaffiginniffissamik ataasiinnarmik atuutsitsilereernikuupput, qinnutqartut taamaalillutik sumiiffimmut ataasiinnarmut saaffiginnissinnanngorlugit. Tunngavik tamanna maanna pitsanngorsaaffigineqarpoq qinnuteqarttut tamarmik immikkut aalajangersimasumik sullissisulernerisigut.

Tamatuma saniatigut isumagineqassapput:

Suliassat suliarineqartarnerat nassuiaasiorneqarlunilu malittarisassaliorneqassaaq, qinnuteqartut taamaalillutik sunik naatsorsuuteqarsinnaanerlutik ilisimanerulissavaat.

Maleruagassat pisariinnerulersinnerisigut aammalu nalunaarusiornissamut piumasaqaatit annikillisinnerisigut kiisalu akuersissutinut assigiinngitsunut piffissat suliassamik suliarinninnermut atorneqartussat sivisussusissaasa naatsorsuutigineqartut allattarlugit suliarinnittarnikkut, piffissaq suliassamik suliarinniffiusartoq sivikillisinneqaassaaq.

Suliassani isumaqatigiinngiffiunngitsuni, assersuutigalugu misissueqqaarnissamut aamma annikitsumik aatsitassarsiornissamut akuersissutit eqqarsaatigalugit, Naalakkersuisunit piginnaatitsinerit malillugit akuersissutit amerlanerusut allaffissornikkut tunniunneqartarnissaannut periarfissat Aatsitassanut oqartussap misissussavai.

- Naatsorsuutigaarput suliniutit taakkua ataatsimoorlutik suliassanik suliarinninnermik sunniuteqarluarnerulersitsissasut, oqartussani isumalluutinik sipaartitsissasut aammalu nalornineq nalornissuteqarnerlu ingerlatseqatigiiffiit ilaasa Kalaallit Nunaanni piiaanissamut akuersissutinik immikkut ittunik qinnuteqarnerminni misigisagaat annikinnerulersissallugu, periusissiassatut nutaatut siunnersuummi taamatut allassimasoqarpoq.

Aatsitassanut periusissaq 2019 - 2023 decembarip 16-iata tungaanut tusarniaassutigineqarpoq.