Aatsitassarsiortut coronap ajornartoortitsinerani annikinnerusumik akiliissapput
Aatsitassarsiorfiit piiaanissamut akuersissutaatillit, aatsitassarsioreernerup kingorna saliinissamut avatangiisinilu nakkutilliinissamut aningaasaatimik uninngasuutigisassamik 50 procentii coronap ajornartoortitsinerata nalaani atorsinnaalerpaat. Suliffeqarfiit katillugit 25 milliuunit koruuninik atuisinnaanerulerput.
Naalakkersuisut aprilip 30-ani ataatsimiinnerminni aalajangerput aatsitassarsiortut suliffeqarfiit piiaanissamut akuersissutaateqartut iluarseeqqinnissamut aamma avatangiisinik nakkutilliinissamut qularnaveeqqutaat affaannanngortinneqassasut.
Tamanna isumaqarpoq Kalaallit Nunaanni aatsitassarsiortut piiaanissamut akuersissutaateqartut, Naalakkersuisunit akuerineqarlutik, qularnaveeqqutitut aningaasaatimik 50 procentii maanna aningaasartuutiminnut allanut atorsinnaaleraat. Aningaasat aatsitassarsioreernerup kingorna iluarseqqiinnissamut, saliinermut, avatangiisnillu nakkutilliinermut atorneqartussaagaluarput. Taama aaqqiisoqarpoq ukiuni marlunni.
Aatsitassanut naalakkersuisoq, Vittus Qujaukitsoq, inuussutissarsiornermut aatsitassanullu ataatsimiititaliamit sisamanngornermi ammasumik siunersiorneqarnerani tamanna paasinarsivoq.
Suliffeqarfiit uku pineqarput:
Ironbark A/S
Hudson Greenland A/S
Black Angel Mining A/S
Greenland Ruby A/S
Dundas Titanium A/S
- Taakku ataatsimut qularnaveeqqusiisussaatitaanermut pisussaaffiinit 25 milliuunit koruunit tikillugit qasukkaallaavigineqarput, Vittus Qujaukitsoq (NQ) aatsitassarsiornermi suliat pillugit coronap ajornartoortitsinerata nalaani qasukkaanerit pillugit ammasumik siunersiorneqarnermini oqarpoq.
Qasukkaanemi suliffeqarfiit aningaasanik uninngasuutiminnik tigoriaannarnik peqarnerulerput.
London Mining A/S aamma Nalunaq A/S qasukkaavigineqanngillat suli piiaanissamut akuersissutaateqannginnamik.
Aningaasaleeqqinnissaq ujartorneqarpoq
Vittus Qujaukitsoq ilisimatitsivoq suliffeqarfiit piiaanissamut akuersissutinut aamma aatsitassarsiorluni misissuinissamut akuersissutinik siuarsimasunut suliassanik suliarinninnermut atatillugu aningaasartuutissaannik kinguartitsinissamut Naalakkersuisut neqeroorsimasut. Aatsitassarsiortut 2021-mi kvartalip aappaata naanerani akiitsoqassapput:
- Naatsorsuutigineqarpoq kvartalip aappaata naanerani 2021-mi aarsitassarsiornermi pisussaaffiit katillugit 14 milliuunit koruuninik akiitsoqarnissaat.
Aatsitassarsiornermut aqutsisoqarfik isertitatigut amigartooruteqarnermi pingasunik iliuuseqarsinnaasoq, naalakkersuisup oqaatigaa.
- Aatsitassarsiornermut aqutsisoqarfiup iluani kontit akornanni nuussinikkut annaasaqaateqarneq matuneqarsinnaavoq.
- Annaaneqartut naatsorsuutigisimanit annertunerussappata, aqutsisoqarfik naatsorsuutitigut nassuiaateqartariaqassaaq.
- Annaasaqarneq matussuserniarlugu ilassutitut aningaasaliinissamut qinnuteqartoqarsinnaavoq.
- Ilassutitut aningaasaliissuteqartoqarnissaanut Naalakkersuisut aningaasaqarnermut akileraartarnermullu ataatsimiititaliamut qinnuteqaammik suliaqaleruttorput. Qinnuteqaat akuerineqassappat Naalakkersuisut piginnaatinneqassapput 20 milliuunit koruunit tikillugit, kontomi pingaarnermi 66.01.05- imi atuineruneq ilaatigut nuutsitsinikkut aningaasalersorsinnaaqqullugu, Vittus Qujaukitsoq sisamanngornermi ammasumik siunersiorneqarnermini oqarpoq.
Konto pingaarneq 66.01.05 tassaavoq Oqartussatut suliarinnittarnerinit isertitat. Assersuutigalugu aatsitassarsiornermi suliffeqarfiit piiaanissamut akuersissummik qinnuteqarnermi suliap suliarineqarneranut tunngatillugu aningaasartuutit tassunga akilertarpaat.