Aatsitassarsiortitseqatigiiffik 1 million koruunit sinnerlugit akiligassaqartoq: - Innuttaasut naammagittartariaqarput

Greenland Ruby pisussaaffimminik naammassinninngilaq. Kommunimut Namminersorlutillu Oqartussanut suleqatigiinnissamut isumaqatigiissut 2018-imili isumaqatiginninniutigineqarluni uninngasoq, pisortaq oqarpoq. Kommunip Namminersorlutillu Oqartussat tamanna ilumuunnginnerarpaat.

Greenland Ruby ukiorpassuarni Qeqertarsuatsiaani innuttaasunut akiligassaqarpoq.

2016-imi Qeqertarsuatsiaani rubinisiorfiup saniatigut ingerlatseqatigiiffiup isumaqatigiissut pituttortoq, IBA-mik taaneqartartoq aamma tiguaa.

Ingerlatseqatigiiffik ukiumut 250.000 koruuninik kulturimut innuttaasunullu aningaasaateqarfimmut innuttaasunut iluaqutaasussamik isumaqatigiissummut pisussaaffeqalerpoq. Akiliineq – isumaqatigiissut malillugu – piiaaffiup atorunnaarsinneqarnissaata tungaanut pisassaaq.

Taamatulli pisoqanngilaq.

Ilumuunnginneraraat

Akiligassat pillugit Greenland Rubymi pisortaq Peter Madsen, Sermitsiaq.AG-p apeqqarissaarfigaa. Ingerlatseqatigiiffiup pisussaaffiminik naammassinninnginnera nassuerutigaa, suliffeqarfiullu sinneqartooruteqannginneranik utoqqatsissuteqarluni.

Sinneqartooruteqarneq sinneqartuunnginnerluunniit apeqqutaatinnagu, Greenland Ruby 1,5 millionit koruunit missaanni Qeqertarsuatsiaani innuttaasunut akiligassaqarpoq.

Sooruna isumaqatigiissut aatsaat isumaqatiginninniutigilerissi?

- Aatsaat aallartinngilagut. Taakku (isumaqatiginninniarnerit, aaqq.) corona pissutigalugu uninnganikuupput – taava aamma kommuni Namminersorlutillu Oqartussat inuit ilaasa ilupaqutiminnik taarsiisarnerannik sukkanerusumik sulisuminnik taarsiisarput. Isumaqatiginninniaqqinnerit 2018-imi aallartippagut, taama isumaqarpunga.

Kommuneqarfik Sermersooq aamma Namminersorlutik Oqartussat Greenland Rubymut IBA-mut isumaqatigiissut isumaqatiginninniutigeqqilerneraat pillugu Sermitsiaq.AG oqaloqatiginnippoq. IBA-mut isumaqatigiissut pisortap oqarneratut isumaqatiginninniutigineqarsimanngitsoq oqarput – 2018-miillu aamma naamik.

Aatsitassanut Inatsisinillu Atuutitsinermut Naalakkersuisoqarfimmi pisortaq, Jørgen Hammeken-Holm, isumaqatiginninniarneqarneranik ingerlasoqarnera pillugu toqqorsivimmi nassaassaqanngitsoq ilisimatitsivoq. Akerlianik oqarpoq:

- Taakku (Greenland Ruby, aaqq.) akiliisussanngoraangamik tamatigut ajusaarnerartarput. Kisianni piumasaqaatit allanngorniarlugit isumaqatiginninniarnernik aallartitsinerunngilaq.

Saqqummiussaqanngitsut

Aatsaat upernaakkut 2022-mi Greenland Ruby IBA-mut isumaqatigiissummi allannguutissanut siunnersuuteqarnissaat isumaqatigiissutigineqarsimasoq, Kommuneqarfik Sermersooq ilisimatitsivoq, tassani susassaqartut, tassa ingerlatseqatigiiffik, kommuni aamma Namminersorlutik Oqartussat tamanna ukiamut misissussavaat.

Kommunimi inuussutissarsiornermut pisortaagallartup oqarnera naapertorlugu – oqaloqatigiinneq aallartileruttorpoq. Naalakkersuisoqarfimmi pisortap Jørgen Hammeken-Holmip tamanna uppernarsarpaa.

Namminersorlutik Oqartussat imaluunniit kommunip isummerfigisinnaasaannik Greenland Ruby suli saqqummiussaqanngitsoq, naalakkersuisoqarfimmi pisortap ilanngullugu oqaatigaa.

Greenland Rubyp IBA-mut isumaqatigiissummi sunarpiaq allanngortikkusunneraa suli ilisimaneqanngilaq. Tusagassiorfitsigut isumaqatiginninniarnani Peter Madsen ilisimatitsivoq – taassuma oqarnera naapertorlugu “pimoorussinnginnerummat”.

Greenland Rubyli sooq – kommunip oqarnera naapertorlugu – inunnut kulturimullu aningaasaateqarfimmut sooq ikisisimannginnera akissuteqarfigerusuppaa.

Suliffeqarfik annertunngitsumik aningaasaateqarfimmut akiliuteqarsimasoq, pisortaq isumaqarpoq, kisianni qanoq amerlatiginersut qangalu pisimanersoq eqqaamanngilaa.

- Aningaasaqarnermik suliaqartoq misissuitissinnaavara.

Ingerlatseqatigiiffiup pisussaaffia nassuerutigaa

Pisortap 50.000-nit 70.000 koruunit tungaannut akiliisoqarsimanera missiliorpaa. Akiliutigineqartussat ilamininngui, tamannali akiliuteqannginnermit pitsaaneruvoq, Peter Madsen isumaqarpoq.

Suliffeqarfiup aningaasat tamakkiisut akilernissaannut pisussaaffeqartoq nassuerutigaa, kisianni qaqugu pissanersoq neriorsuutigisinnaanngilaa.

- Missingersuutit maanna isikkuat naapertorlugu, ukiup naalernerani imaluunniit ukiup nutaap aallartinnerani qaammatikkaartumik sinneqartoortalissaagut. Taamaammat soorunami aningaasaateqarfimmut akiliuteqartalissaagut.

- Taakku (innuttaasut, aaqq.) naammagittalaartariaqarput, tassa pitsaanerpaamik iliuuserisinnaasara.

Ingerlatseqatigiiffiup 50.000 aamma 70.000 koruunit missaanni akiliuteqarsimaneranik, Sermitsiaq.AG Greenland Rubymit uppernarsaammik suli tigusaqanngilaq.

Powered by Labrador CMS