Aatsitassarsiornissamut paasissutissat innuttaasunit nalornissutaapput
Narsarsuarmi Kuannersuit pillugit suliniut pillugu tusarniaasoqareersoq Uraani Naamik aamma savaatillit peqatigiiffiata suliniut pillugu suli apeqqutissaqaraluarput.
Kuannersuarni aatsitassarsiornissaq pillugu innuttaasut suliniummut apeqqutissaqaraluarput, tassami suliniut qularnartutut innuttaasorpassuarnit isigineqarpoq.
Savaatillit Igalikumi aamma Qassiarsummi tusarniaanermi peqataasussaagaluarput, sumiiffinnili taakkunani tusarniaanissaq taamaatiinnarneqarpoq sila pissutigalugu.
Savaatilit Peqatigiit Suleqatigiissutip (SPS-ip) siulittaasuata Lars Nielsenip suliniut pillugu peqatigiiffik akerliusoq oqarpoq.
- Paasissutissat nutaat takkussuutsillugit suliniut akerlileneqaraluttuinnarpoq, Lars Nielsen oqarpoq.
Paasissutissat paasiuminaatsut
Oqallinnermi suut eqqortuunersut eqqortuunnginnersulluunniit paasiuminaatsinneqartut Lars Nielsenip oqaatigaa.
Taamaattumik SPS-ip ICC suleqatigilerpaa, tassani tusarniaanerni akissutigineqartut katersorneqassapput.
Inga Gisladottir Uraani Naamimeersoq tusarniaanermi apeqqutissarpassuaqaraluarpoq, tusarniaanermi arlariinnik apeqquteqarsinnaanissani neriuutigisimagaluarlugu.
- Allaffinni nalilersuinerit nalunaarusiaq imaqarpoq, tassa piviusumik qanoq ilisoqarsinnaanera ilisimaqqissaarneqanngilaq. 'Immaqa' imaaliortoqarsinnaavoq imaluunniit 'ilimanaateqarpumik' nalunaarusiaq imaqarpallaarpoq.
Savaatillit ernumassutaat
Pujoralaat sumut pisinnaanerat ernummatigineqarpoq.
- Sumiiffitsinni anorlikulavoq, aatsitassarsiorfik ammarpat radioaktiviusunik pujoralannik siaruaattoqassaaq. Nunaatitsinnut siaruarnissaat soorunami ernumagaarput, savat nerisaannut ivikkanut siaruarsinnaanerat innumagaarput, Lars Nielsen oqarpoq.
Aatsitassarsiorfik ammassappat Narsamiittoq Neqi A/S ilumut ammaannassanersoq peqatigiiffimmit erumagineqarpoq.
- Suliniummut illersuigaanni akerliugaanniluunniit paasissutissiisoqartariaqarpoq ilumut susoqalernersoq. Paasissutissarpassuit saqqummiunneqartuarput, taakku ilaat tutsuiginartuusarput aammali tutsuiginanngitsunik imaqartarlutik. Suut piviusuunersut oqallinnermi amigaataapput, oqarpoq.
Aatsitassarsiorfik ammassappat sumiiffimmi kinguneqarluartoqarsinnaanera ilisimavaa.
- Narsami inooriaaseq qaffanneqassaaq, tamanna ajunngitsuuvoq. Suliniut aningaasatigut Nunatsinnut iluaqutaassaaq, taamaattoq eqqaamaneqartariaqarpoq pinngortitarput savaateqarnermillu ingerlatsinerput uani pilliutigineqassanngimmat, oqarpoq.
Qaqortumi Narsamilu silarlunnera, kiisalu sulinisussaanerat pissutaalluni savaatilippassuit peqataassanngitsut Lars Nielsen ilisimatitsivoq. Savaatillimmi Qassiarsummi Igalikumilu tusarniaanerni peqataanissartik siunnerfigisimagaluarpaat, taakkuli tusarniaanissat tassa unitsiinnarneqareerput.