Aatsitassarsiornermut periusissap piviusoq takkuitsooraa
Aatsitassarsiornermut periusissiap 2014-2018-ip nunarsuarmi niuernikkut ineriartorneq ilanngussimanngikkaa, Sermitsiaq nalilersuinermini allappoq.
Aatsitassarsiornermut periusissiaq 2014-2018 suliarineqarmat nunarsuarmi aatsitassanik niuernerup ingerlanerliornerulernera naatsorsuutinut ilanngunneqarsimanngilaq.
Periusissiap piffissarititaata qaangiunneranut atatillugu Sermitsiaq nalilersuisimasoq, aviisi Sermitsiaq allappoq.
2007-2011 qiviaraanni Kalaallit Nunaannut aningaasaliinerit kvadratkilometerimut sermitaqanngitsumut uuttorlugu 2007-mit 2011-mut Canadami Australiamilu qaffasissutsimut angummappoq. Suliffeqarfissuit soorlu Rio Tinto, Inco, Implats aamma Anglo Kalaallit Nunaannut isaariamut killikkaluarput, silataaniiginnarlutilli.
Kalaallit Nunaat 2012-imi qasukkarfiuvoq, piffissaq saffiugassat qaffasissumik akeqarfigisaat qaangiummat. Aningaasaliisartut aningaasaliissutiminnik annaasaqariaannaasut takkutinngitsoorput. 2014-imit 2018- imut periusissiamit niuerfimmi ineriartorneq pingaarutilik tamanna isiginiarneqanngingajappoq.
Piffissap periusissiap atuuffigisaata ingerlanerani ingerlatseqatigiiffiit sisamat akiliisinnaajunnaarput (London Mining, Nuna-Minerals, Angel Mining aamma True North Gems). Aningaasaliisut ataatsimut katillugit 1 milliard koruunit missaannik annaasaqarput. Kisianni aningaasaliisartut nunanit allaneersuinnaat aningaasanik annaasaqanngillat. Kalaallit Nunaat aatsitassarsiornermik ingerlatsilernissamut periarfissamik annaasaqarpoq, periarfissat isummerfiginissaannut nalinginnaanngitsumik arriitsuararsuarmik suleriaaseqaratta. Tassami inatsisinik malinnittussaavugut. Inatsisillu aatsitassarsiornermik suliniutit sapinngisamik annertunerpaamik kinguarsarneqarneqarnissaat siunertaralugu ilusilersorneqarsimagunarput.
Aatsitassarsiornermik suliniuterujussuaq (London Miningip Nuup avannaani Isuani saviminermik piiaalernissamik suliniutaa) inuiaqatigiinnut koruuninik milliardinik marlunnik kisitsisitalinnik aningaasanik ingerlaartitsisussatut pilersaarutigineqartoq piviusunngunngitsoorpoq. Aningaasaliinerit annertuut allat piviusunngortitsiniarnikkut ajornartorsiuteqarput. Alcoa oqaatsimik ataatsimilluunniit eqqaaneqanngilaq. Piffissami periusissiap atuuffigisaani Kalaallit Nunaanni piiaanissamut akuersissutinik arfineq-marlunnik pigisaqarfiuvoq, ataaserli ataavartussamik matuneqarpoq (Seqi olivinimik piaaffik), akuersissutilli sinneruttut arfinillit amerlanersaat uninngarusaartinneqarlutik. Piffissap periusissiorfiusup atuuffigisaata naanerani aatsitassarsiorfik
ataaseq ingerlatsivoq.
Piffissap periusissiorfiusup atuuffigisaani aatsitassarsiorfik ataaseq matuvoq (Nalunaq Gold Mine) ataaserlu ammarluni (Aappaluttoq Ruby Mine), Greenland Ruby A/S-imit pigineqartoq. Rubinisiorfik nunaqavissunut 30-t missaanniittunut toqqaannartumik suliffissaqartitsivoq. Tamatumunnga sanilliullugu aatsitassarsiornermik suliaqarfiup allaffissornikkut aqunneqarnissaanut taakkunannga marloriaammik amerlanerit suliaqarput.
Nalilersuineq tamakkiisoq aviisimi Sermitsiaq-mi atuarsinnaavat: