Aatsitassarsiornermut immikkoortortaqarfik Kim Kielsenimit allannguiffigineqarpoq
Aatsitassanut piiaanissamut qinnuteqaateqartarneq aatsitassarsioqatigiiffinnit isornartorsiorneqartareerpoq. Tamanna pissutigalugu Kim Kielsen iliuuseqarpoq, oqartussanik allanngortitsisoqarluni
VSB pillugu nassuiaatinik aamma IBA pillugu isumaqatigiissutinik taaneqartartut kiisalu tamanut tusarniaanerit Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfimmiikkunnaassasut Naalakkersuisut siulittaasuanit Kim Kielsenimit ullumi aalajangerneqarpoq.
Aatsitassanik piiaanissamut qinnuteqaasiornerit aatsitassarsioqatigiiffinnit isornartorsiorneqartarpoq, qinnuteqaateqarnerit ajornarpallaartarneri isorineqartarluni, inuussutissarsiornermut naalakkersuisoqarfik annerusumik isornartorsiorneqartarluni.
Isornartorsiuisoqareersoq Demokraatit IA-lu piumasaqarnikuupput, qinnuteqaateqartoqarnerani sulineq eqaannerusariaqartoq.
Aatsitassarsiorneq pillugu Canadami konferrenceqareersoq aatsitassarsiornermut naalakkersuisup Erik Jensenip isornartorsiorneqartarsimasut aaqqiiviginiarlugit neriorsuuteqarpoq.
Taamaattoq allannguisoqanngilaq. Sermitsiaq.AG-ip paasissutissaatai naapertorlugit Erik Jensen Kim Kielsenimit apriilip naanerani inissinneqarsimavoq.
Aatsitassanut immikkoortortaqarfimmi allannguut
Maannali allannguuteqartoqarpoq.
Suliassaqarfiit, VSB pillugu nassuiaatinik aamma IBA pillugu isumaqatigiissutinik taaneqartartut kiisalu tamanut tusarniaanerit suliarineqartartut aatsitassarsiornermut naalakkersuisoqarfimmit ingerlanneqalissapput.
- Aatsitassanut suliassaqarfimmi allannguinerit aatsitassanut suliassaqarfimmi oqartussaanerup ilusaata tapersersuiffiginissaa pisariillisarnissaalu anguniarlugit ingerlanneqassapput. Ulluni makkunani aatsitassarsiornerni inuiaqatigiit aningaasaqarnikkut isumannaatsumik ingerlanissaat pillugit massakkut suliat pingaarnertigut oqartussaasunit naammassillugit suliarineqarsimalerput, namminersorlutik oqartussat tusagassiutinut nalunaarummi allapput.
Allannguutip aappaa
Kim Kielsen aamma allanik allannguivoq.
Pinaveersaartitsinerup tungaatigut ilaqutariinnut meeqqanullu suliniutit Isumaginninnermut Aqutsisoqarfimmi katersuunneqassapput, matumanilu suliniutit sorpassuarnut tunngasut massakkut aqutsisoqarfinnut suliffeqarfinnullu agguataarneqartut ataqatigiissarnissaat pitsaanerusumillu angusaqarfiginissaat siunertarineqarpoq. Pinaveersaartitsinermut suliassaqarfimmi allannguinerit akisussaaffik Peqqissutsimut, Isumaginninnermut Inatsisinillu Atuutsitsinermut Naalakkersuisup isumagisaa aqqutigalugu pissapput, ilisimatitsissutigineqarpoq.