Aatsitassarsiorneq pillugu aappaagu saqqummersitsisoqassaaq
Nunatsinni aatsitassarsiornermik saqqummersitsisoqartalernissaanut Naalakkersuisut suliniuteqarput. Saqqummersitsineq siulleq Kujataani aggustimi 2020-mi ingerlanneqassaaq.
Aatsitassarsiornermik Kujataani saqqummersitsinissaq Naalakkersuisut pilersaarusiortussanngorpaat. Saqqummersitsinerup siunertarissavaa aatsitassarsiortuni soqutiginninneq siuariartornerlu suli annertunerusumik ineriartornerusinnaanissaa, nunatsinni nutaanik isertitaqarnerulernissaq anguniarlugu. Namminersorlutik Oqartussat tusagassiutinut nalunaarumminni ilaatigut taama allapput.
- Innuttaasut Kalaallit Nunaanni aatsitassarsiornermik soqutiginninnerisa annertusiartornerat pissutigalugu, aammalu aatsitassarsiornermik inuussutissarsiortunut akuunerulersinneqarnissaat siunertat ilagivaat, allassimavoq.
Aatsitassanut suliffeqarnermullu Naalakkersuisoq, Erik Jensen pilersaarusiornermik aqutsisuussaaq.
Ukioq allortarlugu nunatsinni aalisarnermut saqqummersitsisoqartarpoq, taannalu aatsitassanut suliffeqarnermullu naalakkersuisup isumassarsiorfigissavaa.
Susassaqartut arlallit peqataassapput
Aatsitassarsiornermik saqqummersitsinerup siunertaasa ilagissavaat nunatsinni aatsitassarsiorfiit assigiinngitsut pillugit innuttaasut ilisimasaqarnerulernissaat.
Aatsitassanut Suliffeqarnermullu Naalakkersuisoqarfik, Kommune Kujalleq, Sulisitsisut, SIK, sumiiffimmi namminersortut ingerlataqartut siunnersuisooqatigiillu kiisalu sumiiffimmi aatsitassarsiortitseqatigiiffiit aatsitassarsiornermik ingerlataqartut saqqummersitsinissaq sapinngisamik soqutiginartooqqullugu pilersaarusioqatigiissapput.
Saqqummersitsinerup nalaani sammisat aalajangersimasut ataasiakkaat pillugit sammisaqartoqartassaaq, peqataasut innuttaasullu paasisaqarfigerusutaat inissaqartinniarlugit.