Aatsitassarsiorfiup aningaasaateqarfimmut ikisisarsimannginnera nunaqarfimmi aqutsisut uggoraat
Qeqertarsuatsiaani innuttaasut Greenland Rubyp rubinisiorluni aatsitassarsiornerani ukiumut 250.000 koruuninik pisartussaapput. Suliffeqarfilli aningaasaateqarfissamut suli ikisisimanngilaq.
- 1 ørennguamilluunniit suli takunngilagut.
Qeqertarsuatsiaani nunaqarfinni aqutsisut siulittaasuat Ingvar Motzfeldt Sermitsiaq.AG-mut taama oqarpoq.
Taamani True North Gems, Namminersorlutik Oqartussat Kommuneqarfik Sermersoorlu IBA-mut isumaqatigiissummik atsioqatigiimmata, aatsitassarsioqatigiiffik pituttorneqarpoq kulturimut innuttaasunullu aningaasaateqarfimmut ukiumut 250.000 koruuninik akiliisassasoq.
Aatsitassarsioqatigiiffik maanna rubinisiortoq, Greenland Ruby, isumaqatigiissummik suli malinninngilaq, aningaasallu katillugit 1,5 milliuunit koruunit missaat aningaasaateqarfimmut ikisassani suli ikisimanagit.
- Pissutsit kipiluttunarluinnarput. Uagullu nunaqarfimmi aqutsisutut qanoq ilioriarsinnaanngilagut. Aaqqiisoqarnissaa utaqqiinnartariaqarparput uagut sinnerluta atsiortoqarsimammat, Ingvar Motzfeldt oqarpoq.
Nunaqarfimmi inerisagassaqaqaaq
Isumaqatigiissut 2014-imi atsiorneqarmat Qeqertarsuatsiaani innuttaasut isumalluarput. Aatsitassarsioqatigiiffik 2014-imi aamma 2015-imi ukiumut 100.000 koruuninik aningaasaateqarfimmut akiliisassaaq. 2016-imiilli aatsitassarsiorfiup matunissaata tungaanut ikisassat 250.000 koruuninut qaffanneqassallutik.
Isumaqatiginninniarnerup nalaani nunaqarfimmi innuttaasut ernumaateqarnertik oqariartuutigisarsimavaat. Soorlu nunanit allamiut initunerulissasut, nunaqarfiullu ineriartornissaa puigorneqassasoq.
- Isumaqatigiissut soorunami qujarussimavarput. Nunaqarfimmi innuttaasullu akornanni aningaasartassaat atorluarneqarsinnaakutsooraluarput, Ingvar Motzfeldt oqaluttuarpoq.
Nunaqarfimmi aqutsisut siulittaasuat oqaluttuarpoq aningaasat Qeqertarsuatsiaani peqatigiiffiit siuarsarnissaannut atorsinnaasut. Aningaasaateqarfimmullu atuartut timersoqatigiiffiillu angalasussat qinnuteqartarsinnaanerat aamma takorloorneqarsimavoq.
- Periarfissaqarpoq, aningaasartaqanngippalli soriarsinnaanngilagut atorfissaannullu eqqartuisinnaanata, oqarpoq.
Ingvar Motzfeldt ilisimatitsivoq nunaqarfiit aqutsisui Kommuneqarfik Sermersuumi borgmesteriusimasunut marlunnut aaqqeeqqusillutik siusinnerusukkut kaammattuuteqarniartarsimasut. Maanna borgmesteriusoq Avaaraq S. Olsen nunaqarfimmi aqutsisunit suli oqaloqatigineqanngilaq, naapinnissaali qilanaarineqarpoq.